Kadaj-Bujupi: Mund të na burgosin, por nuk na i mposhtin argumentet

Donika Kadaj-Bujupi, shefe e Grupit Parlamentar të AAK-së, ka thënë se deputetët mund të burgosen, por asnjëherë nuk mund të mposhtet forca e argumentit të opozitës.
Ajo i ka bërë thirrje kryeministrit qe t`i hap rrugë kthimit të normalitetit në vend, derisa ka kërkuar ose tërheqje të nënshkrimeve, ose dorëheqje të Qeverisë.

Më poshtë lexoni deklaratën e plotë të Kadaj-Bujupit:

Sot barikaduan Kuvendin për t’i burgosur deputetët dhe mund ta bëjnë, madje mund ta burgosin edhe krejt opozitën. Por, nuk mund të mposhtin forcën e argumentit tonë.

Jemi të vetëdijshëm për barrën e rëndë të përgjegjësisë në ketë proces jo të lehtë. Mirëpo, përkushtimi për të mos lejuar humbjen e tokës dhe humbjen e resurseve tona kombëtare na shtynë të vazhdojmë, pavarësisht sfidave dhe çmimit në rrugën tonë të drejtë.

Si deputetë, jemi betuar që do t’i shërbejmë vendit. Sot vendi po rrezikohet nga këto vendime. Prandaj, do të vazhdojmë të rezistojmë deri në tërheqjen e këtyre marrëveshjeve.

E therrasim kryeministrin që, ndërmjet interesave të Serbisë dhe kërkesave racionale të qytetarëve tanë, të përcaktohet për këtë të fundit dhe t’i hapë rrugë kthimit të normalitetit në vend dhe kuvend.

Tërheqje ose Dorëheqje!