Guardiola rinovon me Bayernin?

Pep Guardiola dëshiron të qëndrojë te Bayerni i Mynihut edhe për dy sezone të tjerë. Lajmin e bën të ditur faqja gjermane e internetit TZ.DE sipas së cilës, palët do të ulen në një tryezë për të diskutuar të ardhmen në fund të muajit nëntor.

Sipas informacioneve që vijnë nga Spanja, gjatë një takimi që Guardiola pati me miqtë e tij në vizitën që i bëri holandezit Johan Cruyff, trajneri katalanas u ka bërë me dije njerëzve të tij të afërt se synon ta vazhdojë projektin deri në vitin 2018, shkruan SuperSport. E njëjta faqe shton se Guardiola është përshtatur me jetën në Gjermani dhe ndihet shumë i lumtur.

Miqtë e tij bëjnë me dije se trajneri i kampionëve të Bundesligës ka marrë disa oferta por i ka refuzuar pasi është shumë i lidhur me skuadrën që ka në dispozicion. Lajmi i rinovimit të mundshëm të Guardiolas është përfolur që prej disa javësh nga mediat gjermane që theksojnë se palët janë në fund të bisedimeve dhe sipas të gjitha gjasave, zyrtarizimi do të bëhet në datën 27 Nëntor.

Një sinjal i rëndësishëm ky për tifozët e Bayernit të Mynihut pasi emri i ish trajnerit të Barcelonës është lakuar shpesh herë muajt e fundit, madje u mendua se do të ishte Carlo Ancelotti pasuesi i katalanasit në stolin e gjermanëve.