A ka më të fortë se Ronaldo? Shifrat thonë ‘JO’

Seria e golave të Cristiano Ronaldos nuk ka fund. Pas tregolëshit të shënuar ndaj Real Sociedadit, ylli portugez ka arritur në kuotën e 24 golave në total këtë sezon – 16 në La Liga dhe 8 në Ligën e Kampionëve, respektivisht 62 gola në vitin 2013.

CR7 është favorit për ta fituar çmimin ‘Pichichi’, ku e ka për kundërshtar serioz vetëm Diego Costan e Atletico Madridit. Cristiano ka realizuar 9 gola vetëm në 4 ndeshjet e fundit. Ronaldo ka shënuar 23 herë 3 apo më shumë gola në vetëm një ndeshje, duke iu afruar rekordit të Alfredo Di Stefanos, që kishte shënuar në 31 ndeshje, 3 apo më shumë gola.

Ronaldo ka shënuar tre dygolësha dhe një hat-trick në katër vizitat e fundit të Real Sociedadit në Santiago Bernabeu. Sociedadit ai ia ka shënuar 10 gola në 6 ndeshje. Ronaldo e kaloi Samuel Eto’on, duke arritur në kuotën e 163 golave në La Liga, duke u bërë golashënuesi i 14-të më i mirë në histori të kampionatit spanjoll. Në përgjithësi, Ronaldo ka shënuar 226 gola me Real Madridin, një shifër spektakolare, duke e ditur se ai ka zhvilluar vetëm 216 ndeshje, pra më shumë se një gol për ndeshje. Ronaldo definitivisht është i madh.