Mustafa: Do të jem kryetar i Prishtinës

Isa Mustafa nuk druan se mund ta humbë pushtetin në Prishtinë, në garën e balotazhit që do ta zhvillojë më 1 dhjetor me Shpend Ahmetin e Lëvizjes Vetëvendosje. Këtë komoditet e ka krijuar nga bindja se Ahmeti nuk ka ndonjë pikë të fortë me të cilën mund ta sfidojë seriozisht. Për këtë qëllim ka vendosur të mos bëjë koalicion me asnjë subjekt politik, ashtu sikur po vepron edhe kundërkandidati i tij.

Mustafa qysh tani është i fokusuar për zgjedhjet parlamentare me bindjen se LDK do të dalë e para për ta formuar qeverinë e ardhshme, shkruan “Tribuna”. Por, ai nuk e ka ndarë mendjen nëse do të largohet nga komuna për ta kërkuar drejtimin e Qeverisë.

Mustafa, si kryetar partie, ka dalë kundër idesë së bashkëpartiakut të tij Lutfi Hazirit, sa i takon çështjes së futjes së shamisë në shkolla.

Ka thënë se kjo çështje nuk u takon kryetarëve të komunave por i takon Gjykatës Kushtetuese të japë sqarime përfundimtare nëse duhet lejuar shamia në shkolla. Për Mustafën nuk është e rëndësishme se në cilat karrige ulet në Kuvend djali i ish-presidentit Ibrahim Rugova, Uka. Atë e konsideron pjesë të LDK-së. /Tribuna/