Abrashi: Mbi 300 vende të reja pune

Ministri i Punës dhe Mirëqenies Sociale, Arban Abrashi, tha sot në Prishtinë, se mbi 300 vende të reja të punës janë të lira në panairin e hapur në Prishtinë, duke ftuar të rinjtë që të shfrytëzojnë këtë mundësi të mirë për punësim.

Ministri Abrashi së bashku me përfaqësuesit e Ambasadës Gjermane në Kosovë dhe me GIZ-in, sot kanë bërë hapjen e Panairit të Punës në kuadër të Projektit “Punësimi i të Rinjve”.

“Për momentin janë mbi 300 vende të lira pune dhe shumë mundësi për praktikë. Panairi është i hapur dhe mbahet në modelariumin e Fakultetit të Arkitekturës, dhe paraqet një mundësi të shkëlqyeshme për të gjithë punëkërkuesit”, tha Abrashi, duke premtuar angazhim dhe rezultate konkrete në hapjen edhe të vendeve të reja të punës në ditë në vijim.