Agjencia e lajmeve Kosovanews kosovanews.info
A ka terrorizëm në Kosovë. “Arrestimet e fundit nuk janë risi për shumë arsye dhe se këto masa operative që janë ndërmarr sipas mendimit tim duken disi të vonuara. Është rregull se më lehtë është të parandalohet se sa të luftohet çfarëdo veprimesh që janë të pa ligjshme”, thekson për standardi.info, mr. Avni Islami, ekspert i sigurisë, i specializuar rreth grupeve ekstremiste të cilat thirren ne emër të fesë.
Kërcënimet e fundit kundër Policisë së Kosovës nga i ashtuquajturi “Xhemati i Teuhidit dhe Xhihadit në Kosovë”, madje thirrjet e grupeve të dyshimta për xhihad në Siri e veprimtari tjera të dyshimta, shqetësojnë tej mase organet e sigurisë së Kosovës, ekspertët dhe vet popullin shqiptar.
A është e përgatitur Kosova qe të ballafaqohet me grupet e këtij rangu? Eksperti i sigurisë, mr Avni Islami thotë për standardi.info se Republika e Kosovës, segmentet e inteligjencës dhe ato të sigurisë duhet të veprojnë në mënyrë qe të parandalohen veprimtari të dyshimta e të stimuluara nga armiqtë e Kosovës.
“Paralajmërimet e hershme të shumë analistëve dhe ekspertëve të sigurisë se në Kosovë mund të instalohen rrjetet e grupeve terroriste dhe se ato në emër të Islamit, mund ta rrezikojnë sigurinë nacionale në planin afatgjatë, nëse institucionet përkatëse nuk ndërmarrin hapa të nevojshëm për t’i penguar dhe për t’i neutralizuar me kohë, që të mos të zhvillojnë aktivitetet e tyre të paligjshme, atëherë kur janë në kundërshtim me parimet themelore të lirive dhe të njeriut dhe në kundërshtim me fenë”, thekson për standardi.info, z. Islami, duke shtuar se “Arrestimet e fundit nuk janë risi për shumë arsye dhe se këto masa operative që janë ndërmarr sipas mendimit tim duken disi të vonuara. Është rregull se më lehtë është të parandalohet se sa të luftohet çfarëdo veprimesh që janë të pa ligjshme”.
Ai thekson se komunikata e lëshuar nga i ashtuquajturi “Xhemati i Teuhidit dhe Xhihadit në Kosovë”, është jashtëzakonisht shqetësuese, sepse me këtë komunikatë është kërcënuar Policia e Kosovës ku thuhet se nëse nuk i liron gjashtë të arrestuarit, do të përballet me “sulme të dhimbshme”. Prandaj në këtë drejtim duhet të gjithë ata që ndihen të rrezikuar të japin kontributin e vetë. “Duke filluar nga familje, shkolla, xhamia, OJQ-të , si dhe të gjitha institucionet e sigurisë që të mos ndodhin akte terroriste sepse ato janë me pasoja të paparashikueshme”, vlerëson Islami.
Edhe BIK kërkon nga të rinjtë, që mos të bien pre e organizimeve të dyshimta,e cila thekson se BIK ”është institucioni i vetëm që jep udhëzime për besimtarët, interpreton e sqaron parimet dhe mësimet fetare”.
Situata mori dimensione kërcënuese pas publikimit të një letre në emër të “Xhematit të TeHuidit dhe Xhihadit në Kosovë”, e cila paralajmëron policinë për sulme të përgjakshme, nëse nuk lirohen gjashtë persona të arrestuar javën e kaluar. Të arrestuarit janë nga vende të ndryshme të Kosovës dhe dyshohet se ata janë të kthyer nga lufta e Sirisë