Humolli: Bashkësia ndërkombëtare e imponoi Thaçin e Halitin në politikë

Në emisionin “Rubikon”, ku po debatohet për skeçin e fundit të grupit humoristik “Stupcat”, ish-eprori i UÇK-së në Zonën Operative të Llapit, Fatmir Humolli tha se “Stupcat” kanë bërë gabim me atë skeç pasi kanë ofenduar luftën e Ushtrisë Çlirimtare të Kosovës.

Humolli, po ashtu, tha se bashkësia ndërkombëtare nuk kishte ndërhyrë në Kosovë për të çliruar Kosovën, por për të ndihmuar Serbinë, duke e mbështetur deklaratën e tij në faktin se në Kushtetutën e Kosovës nuk ekziston një nen që lejon bashkimin e Kosovës me një shtet tjetër.

Ai theksoi bashkësia ndërkombëtare Kosovës ia ka imponuar në politikë Hashim Thaçin e Xhavit Halitin.

“Shtetet demokratike na e kanë imponuar Thaçin e Halitin dhe janë faktorizuar me ndihmën e tyre. Ata nuk janë produkt i yni”, tha Humolli.