Pacolli në Kushtetuese: Presidenti, me votë të drejtpërdrejtë nga populli

Pesë vite nga largimi prej postit të Presidentit të Kosovës dhe vetëm një muaj para procesit të zgjedhjes së kryetarit të ri të shtetit kosovar, ish-presidenti Behgjet Pacolli ka depozituar në Gjykatën Kushtetuese një kërkesë për zgjedhjen e Presidentit me votë të drejtpërdrejtë nga qytetarët.

Presidenti i Aleancës Kosova e Re kërkon nga Gjykata Kushtetuese, që të interpretojë rezolutën e Kuvendit, e cila është miratuar në vitin 2011 pas marrëveshjes politike mes kreut të PDK-së, Hashim Thaçi; atij të LDK-së, Isa Mustafa; si dhe vet kreut të AKR-së, Behgjet Pacolli, e cila parashikonte që zgjedhja e presidentit të ardhshëm të Kosovës të bëhej nga qytetarët, e jo nga Kuvendi.

Top Channel e ka siguruar nga burime pranë Gjykatës Kushtetuese, lëndën që Pacolli ka dorëzuar të enjten në këtë gjykatë.

Sipas lëndës, Pacolli ka kërkuar nga Kushtetuesja, që të vërtetojë shkeljet e lirive dhe të drejtave të parashtruesit, si dhe të detyrojë Kuvendin të zbatojë rezolutën, duke zbatuar procedurën e mëtejshme të votimit të amendamenteve kushtetuese, të propozuara për zgjedhjen e drejtpërdrejtë të presidentit, pa e paragjykuar rezultatin e votimit dhe duke respektuar mandatin e lirë të deputetëve e parimet e tjera kushtetuese.

Ish-Presidenti Pacolli pretendon se, shkelja e Kushtetutës është bërë në vazhdimësi prej vitit 2011, pasi – sipas lëndës së tij, – Kuvendi ka qenë i detyruar me rezolutë, që t’i hedhë në votim amendamentet kushtetuese, që parashikonin formën e zgjedhjes së presidentit nga qytetarët.

Në kërkesën e tij drejtuar Gjykatës Kushtetuese, Pacolli ka cituar rezolutën e miratuar nga Kuvendi më 7 prill 2011, e cila parashikonte që zgjedhjet e para presidenciale në Kosovë të mbaheshin jo më vonë se 6 muaj nga data, në të cilën ndryshimet e nevojshme kushtetuese dhe legjislative do të hynin në fuqi.

Por – sipas Pacollit, – ndërkohë që Kuvendi ka formuar komisionet, të cilat kanë hartuar amendamentet kushtetuese për zgjedhjen e drejtpërdrejtë të Presidentit, procesi është ndërprerë dhe, amendamentet që kishin kaluar edhe filtrin e Gjykatës Kushtetuese nuk ishin hedhur fare për votim në Kuvend.

Ndaj, Pacolli pretendon se, atij dhe partisë së tij i janë shkelur të drejtat, pasi ishin pjesë e marrëveshjes, e cila ishte shndërruar në rezolutë. Me këtë rast, Pacolli ka kërkuar nga Gjykata Kushtetuese, që të vërtetojë shkeljet e lirive dhe të drejtave dhe të detyrojë Kuvendin, që të zbatojë rezolutën, duke zbatuar procedurën e mëtejshme të votimit të amendamenteve të propozuara për zgjedhjen e drejtpërdrejtë të presidentit.

/ Top Channel