KMDLNJ kërkon që Sami Lushtaku t’i kthehet trajtimit shëndetësor

Këshilli për Mbrojtjen e të Drejtave e të Lirive të Njeriut në Prishtinë është informuar për rastin e Sami Lushtakut , i dënuar dhe në vuajtje të dënimit në Burgun për Siguri të Lartë në Dyz të cilit i është ndërprerë shërimi në QKUK dy ditë pas qëndrimit aty.

KMDLNJ thotë se i dënuari Sami Lushtaku është hospitalizuar për shkak të problemeve kardiake (sipas kardiologëve) të cilët, gjithashtu vlerësojnë se shërimi apo përcjellja e gjendjes shëndetësore kërkon më shumë kohë dhe se vetëm dy ditë janë të pamjaftueshme në rastin konkret.

“KMDLNj përkujton se personat e privuar nga liria, të paraburgosur apo të dënuar i humbin apo iu kufizohen disa të drejta por nuk mund t’iu mohohet e drejta për shërim në ambientet e burgut ( për raste më të lehta ) apo në spitalet rajonale apo QKUK, (në raste më të rënda ). Përgjegjës për shëndetin e personave të privuar nga liria në burgje është Shërbimi Shëndetësor i Burgjeve që i përgjigjet Ministrisë së Shëndetësisë, gjykatat kompetente kur rasti nuk ka përfunduar me një vendim të prerë ndërsa përgjegjës për sigurimin e kushteve të parapara me ligj gjatë qëndrimit në trajtim shëndetësor është Shërbimi Korrektues i Kosovës i cili zbaton vendimet e Gjykatës kompetente”, thuhet në reagimin e KMDLNJ-së.

“I dënuari Sami Lushtaku, për shkak të mohimit të së drejtës për shërim ka kaluar në grevë urie si një mjet i skajshëm për realizimin e kësaj të drejte. Nuk është rast i izoluar i dënuari Sami Lushtaku që detyrohet të kalojë në grevë urie për shkak të një vendimi të gjykatës kompetente apo mos harmonizimit të veprimeve midis Ministrisë së Drejtësisë , që është përgjegjëse për Shërbimin Shëndetësor të Burgjeve dhe Ministrisë së Drejtësisë që është përgjegjëse për Shërbimin Korrektues të Kosovës”, shkruan tutje KMDLNJ.

Sipas KMDLNj – së, dënimi i Sami Lushtakut paraqet non sens juridik dhe logjik dhe në praktikat gjyqësore në botë nuk njihet edhe një rast i tillë. Përkundër kësaj, KMDLNj kërkon të respektohen të drejtat e njeriut të personave të privuar nga liria për një trajtim shëndetësor cilësor dhe në përputhje me gjendjen shëndetësore të personave të privuar nga liria në të kundërtën përgjegjësinë për përkeqësimin e shëndetit të këtyre personave e marrin Gjykatat kompetente, Shërbimi Shëndetësor i Burgjeve dhe Shërbimi Korrektues i Kosovës.

“Me kapacitet që i ka, profesionale dhe fizike, në burgjet e Kosovës nuk mund të trajtohen rastet e rënda andaj të dënuarit, sidomos ata me rrezikshmëri të lartë , për shkak të sigurisë dhe nevojës së angazhimit të stafit shtesë, shumë herë i trajtojnë shkel e shko dhe ka raste kur përkeqësohet shëndeti i tyre”, thuhet në komunikatën e KMDLNJ-së.