VV: Kodi telefonik rrezikon sovranitetin e Kosovës

Përveç marrëveshjes për Asociacionin, opozita do të përdorë metodat e njëjta edhe kundër marrëveshjes për Telekomunikacion, që ishte pjesë e pakos së marrëveshjeve të 25 gushtit të vitit 2015-të, mes Kosovës dhe Serbisë në Bruksel.

Sepse, sipas tyre, puna e operatorit të ri serb, në Kosovë, rrezikon sovranitetin e vendit, zhvillimin ekonomik dhe sigurinë. Kryetari i Lëvizjes Vetëvendosje Visar Ymeri, tha se kodi i ri telefonik në Kosovë, 383, nuk do të jetë i Kosovës por do të jetë pronë e Serbisë, veçse Kosova do të jetë përdoruese e tij.

Ymeri, gjatë një konferencë për shtyp, tha se kompania të cilës do t’i jepet leje për operim në Kosovë, është kompani shtetërore e Serbisë. Sipas tij, zbatimi i një marrëveshje të tillë, do të ketë pasoja për shtetin e Kosovës.

Ymeri: Kodi i ri telefonik do të ndikojë në mos-zhvillim ekonomik dhe siguri

“Kjo natyrisht që është një çështje shtetërore dhe nuk mund të vendoset në këtë mënyrë. Aq më pak të lejohet e të durohet që një kompani shtetërore të ofrojë shërbime telekomunikimi bren da një shteti tjetër duke pas parasysh jo vetëm aspektin e sovranitetin dhe zhvillimit ekonomik por veçanërisht edhe atë të sigurisë. Sepse është çështje sigurie se kush dhe si i kontroll bisedat telefonike, këmbimet tjera të komunikacionit mes qytetarëve të një vendi”, tha Ymeri.

Përveç dëmtimit të sovranitetit të Kosovës, pengesave në zhvillim ekonomik dhe rrezikimit të sigurisë, Ymeri tha se marrëveshja për Telekomunikacionin do të integrojë sistemin e telekomunikimit të Kosovës, në atë të Serbisë.

Ymeri: Thirrjet nga Kosova në Serbi do të konsiderohen lokale

“Çfarë po ndodhë me këtë marrëveshje është një integrim i plotë i sistemit të telekomunikimit të Kosovës në atë të Serbisë. Në këtë pikë thuhet që ndërmarrja e re, pra ajo që do të themelohet, të cilën po don ta licencojë Blerand Stavileci do t’i mundësohet që t’i le jojë përdoruesit e saj që mos të përdorin kodin thirrës ndërkombëtar të Serbisë, kur thërrasin nga Kosova, që i bie praktikisht që thirrje nga Kosova në Serbi do të llogariten si thirrje lokale. Që i bie praktikisht me këtë, rrjeti i telefonisë në Kosovë nuk konsiderohet si një rrjet i cili është i ndarë nga ai në Serbi, por konsiderohet si rrjet i integruar në Serbi”, tha Ymeri.

Për kodin telefonik foli edhe Ismet Hamiti, ekspert i kësaj fushe në Lëvizjen Vetëvendosje.

Sipas tij, pasojat e marrëveshjes për kodin do të jenë fatale për Kosovën.

Hamiti: Kodi ndërkombëtar për Kosovën mund të zgjidhet pa përfshirë Serbinë

“Kodi ndërkombëtar për Kosovën mund të zgjidhet pa Serbinë. Dhe këtë publiku duhet ta dijë, se pse e kanë fut këta në lojë Serbinë, unë nuk kam shpjegim. Kosova edhe pa qenë anëtare e OKB-së mund të aplikojë p ër kodin ndërkombëtar, këtë ja lejon kushtetua e ITU-së…..pse nuk e kanë bërë këtë, pse e kanë zgjedhë atë rrugë përmes Serbisë, unë nuk kam shpjegim dhe nuk ka asnjë shpjegim racional që të më bind se kjo ka qenë rruga e duhur. Pasojat do të jenë fatale për sovranitetin e shtetit tonë”, tha Hamiti.

Sipas tij, një zgjidhje tjetër do të ishte zbatimi i rezolutës së Kuvendit, për aplikimin e kodit 355 të Shqipërisë në Kosovë.

Visar Ymeri bëri të ditur se do të vazhdojnë kundërshtimin e marrëveshjeve me Serbinë, përshirë edhe këtë për kodin telefonik, me metodat e njëjta siç i kanë praktikuar deri tani.

Ymeri: Do të vazhdojmë të kundërshtojmë marrëveshjet

“Ne do të vazhdojmë me kundërshtimin tonë që e keni parë deri tash dhe me të njëjtat metoda të kundërshtimit, sepse zbatimi i një marrëveshje të tillë, shkon ndesh me themelet e shtetit dhe sa I përket telekomunikacionit Kosova e humb njëherë e përgjithmonë mundësinë që rrjetin e vet ta ketë të pavarur dhe mbi kontroll sovran, karshi ndërhyrjeve nga Serbia”, tha ai.

Javën e kaluar, Qeveria E Kosovës ka nxjerrë një vendim përmes së cilit kërkon nga Autoriteti Rregullativ i Komunikimeve Elektronike dhe Postare që të bëjë autorizimin e përkohshëm dhe të kufizuar për operatorin e ri serb, të telefonisë mobile “MTS”, e që pritet të fillojë së punuari në Kosovë, nga koha kur vendit do t’i miratohet kodi telefonik 383.

Sipas Qeverisë, fillimi i operimit të këtij operatori është në përputhshmëri me negociatat teknike që janë zhvilluar në Bruksel./G.Kadrija.