Nëntë persona të arrestuar në operacionin “Medikamenti”

Policia e Kosovës ka realizuar një operacion policor të koduar me emrin “Medikamenti”, i cili ka rezultuar me arrestimin e nëntë personave të dyshuar për kontrabandim të medikamenteve.
Pas gjashtë muajsh hetimesh intensive të realizuara nga Sektori i Hetimeve të Departamentit të Policisë Kufitare, është realizuar ky operacion i gjerë policor i cili ka përfshirë dy rajone të Kosovës.
Ky është njoftimi i Policisë:
Operacioni policor është realizuar në bashkëpunim me Doganat e Kosovës dhe Inspektoratin për Pajisje dhe Produkte Medicinale, me ç’rast është bërë bastisja e shtatëmbëdhjetë (17) lokacioneve të ndryshme, në regjionin e Prishtinës dhe Pejës.
Gjatë bastisjes janë gjetur dhe konfiskuar sasi e madhe e barnave (mijëra produkte medicionale) që dyshohet se janë të pakontrolluara dhe të paverifikuara, me prejardhje kryesisht nga Serbia të kontrabanduara në Republikën e Kosovës në mënyrë ilegale.

Pas bastisjes janë arrestuar dhe dërguar në mbajtje të dyshuarit:
• K. V. mashkull kosovar/shqiptar
• S. R. mashkull kosovar/shqiptar
• V. A. mashkull kosovar/shqiptar
• A. A. mashkull kosovar/shqiptar
• A. A. mashkull kosovar/shqiptar
• N. Z. mashkull kosovar/shqiptar
• A. J. mashkull kosovar/shqiptar
• A. B. mashkull kosovar/shqiptar

Të arrestuarit dyshohet se në mënyrë të organizuar dhe në bashkëpunim kanë kontrabanduar barna të ndryshme, duke dëmtuar buxhetin e Kosovës.
Me këtë rast dyshohet se këta persona kanë kryer veprat penale ‘kontrabandim me mallra’, ‘shmangie nga pagesa e tarifave të detyrueshme doganore’, ‘ushtrim i kundërligjshëm i veprimtarisë mjekësore dhe farmaceutike’, ‘krim i organizuar’ dhe ‘posedim i paautorizuar i armëve dhe municionit’.
Gjatë kontrollimit të lokacioneve janë gjetur dhe konfiskuar një revole të kal.7.62 mm dhe dy pushkë gjuetie.
Operacioni i bastisjeve dhe arrestimeve është kryer me urdhër të Prokurorisë, respektivisht Gjykatës Themelore në Prishtinë.
Ndërkaq Policia sa po ka njoftuar se e ka arrestuar edhe personin e nëntë në lidhje me këtë rast.