Mustafa kërkon bashkimin pozitë, opozitë, gra, burra…

Kryeministri Isa Mustafa në një postim në facebook derisa është lavdëruar për punën që kanë bërë institucionet, ka bërë thirrje që të bëhen bashkë pozitë e opozitë, që sipas tij, vendi të shkoj përpara, raporton TV ARTA.
“Nuk ka arsye të mos jemi bashkë të gjithë, pozitë dhe opozitë, gra e burra, të rinj e të moshuar, institucione, shoqëri civile e biznese, për të çuar proceset përpara, për ta ndërtuar një shtet të fortë, të respektuar me perspektivë euroatlantike. Më së paku kemi nevojë të ndahemi në patriotë e tradhtarë, në akuzues dhe të korruptuar, sepse njihemi të gjithë.
Më së shumti kemi nevojë të punojmë në ndërtimin e institucioneve tona demokratike me njerëz tanë, këta që jemi”, ka shkruar Mustafa.
Ai po ashtu ka theksuar se Kosova ka arritur shumë vitin e fundit, por se nuk i ka afirmuar këto të arritura.
“Janë arritur marrëveshje për investime të rëndësishme me Bankën Evropiane për Rindërtim dhe Zhvillim. Vlerësimet e Fondit Monetar Ndërkombëtar janë se Kosova ka stabilizuar tërësisht buxhetin e saj, për dallim prej shumë vendeve në regjion dhe vendeve të tjera. Janë rritur për 25% ndihmat sociale, janë rritur mjetet për pensione për kontributdhënës mbi 25% dhe janë rritur pagat mesatarisht për 6% përmes aplikimit të shtesave për përvoja të punës.
Janë përafruar krejtësisht kushtet për liberalizim të vizave. Nuk ka raste dhe afera të korrupsionit nga qeveritarët. Jemi kujdesur për krijimin e kushteve më të mira për organet e drejtësisë, për gjyqtarë dhe prokurorë”, ka shkruar ndër të tjera Mustafa.