Shqiptarët e Luginës së Preshevës ndihen të tradhtuar

Shqiptarët e Luginës së Preshevës as nuk janë bërë me zyrë në Gjilan e në Prishtinë, e as nuk kanë përfituar të drejta të plota me shtetasit e Kosovës, transmeton KTV.Këto janë vetëm disa prej pikave të Rezolutës për të drejtat e shqiptarëve në Luginën e Preshevës, miratuar para dy muajsh në Kuvendin e Kosovës. Në Rezolutë gjithashtu parashihet që qeveria të kërkojë reciprocitet me të drejtat e serbëve në veri, e themelimi i një fondi zhvillimor për 3 komunat me shqiptarë në Serbi. Por të gjitha këto kanë mbetur vetëm në letër, shprehen anëtarë të Lëvizjes Vatra, përfaqësuese e shqiptarëve të Luginës, ndërsa mbesin në pritje të hapave konkretë. Ndërsa iniciuesi i kësaj rezolute, deputeti i Kuvendit të Kosovës, Lutfi Haziri, tha se qeveria po e injoron kuvendin me mosndërmarrjen e obligimeve të saj.  Në Qeverinë e Kosovës nuk kanë pasur informata në interesimin e KTV-së nëse është bërë diçka në realizimin e pikave të Rezolutës. Ndër të tjera, në debatin e zhvilluar paraprakisht në Kuvend, nga kryeministri i Kosovës ishte propozuar të bëheshin edhe ndryshime kushtetuese për shqiptarët e Luginës, për çka nuk ishte pajtuar opozita.