IQPM zotohet në Bellanicë për një qeverisje të ndershme

Iniciativa Qytetare për Malishevën në një tubim elektoral të mbajtur të enjten mbrëma në objektin e shkollës së fshatit Bellanicë ka kërkuar votën e banorëve për ndryshime. Sipas njoftimeve të këtij subjekti, kreu i IQPM-së dhe kandidati për kryetar komune, Ragip Begaj, ka thënë se “paknaqësitë e qytetarëve kanë arritur kulmin, sepse Komuna e Malishevës është qeverisur nga shoferë, nga individë të caktuar, e jo nga të zgjedhurit e popullit”.

“Malisheva është qeverisur nga njerëz që nuk kanë lidhje zyrtare me komunën”, është shprehur Begaj. “IQPM po përkrahet fuqimisht nga të gjithë qytetarët e Malishevës”, ka shtuar ai, duke u zotuar për një qeverisje të ndershme. Pushteti aktual i Malishevës sipas IQPM-së “ka filluar të merret me shtresën më të ndjeshme të njerëzve, shtresën sociale ku këta njerëz po i kushtëzon me votë për vazhdimin e asistencës sociale”.

Deputeti Fatmir Limaj, sipas njoftimeve në këtë tubim, ka bërë thirrje për një fushatë fer dhe demokratike. “Vlerësoni vetë nëse jeni për ndryshime apo doni të vazhdoni me qeverisjen e deritashme” ka porositur ai.