Edhe Prokuroria e Prishtinës po heton ngjarjet në Kuvend

“Është iniciuar hetimi dhe është në procedurë,” ka thënë Beka.

Kryeprokurori i Prokurorisë Themelore të Prishtinës tregoi përafërsisht se nga do të orientohen hetimet.

“Shkaktimi i rrezikut të përgjithshëm, por nuk është përfundimtar,” sqaroi kryeprokurori Beka, për Kallxo.com.

Dje në seancën e Kuvendit nga opozita u tentua të pengohej puna me fishkëllima, hedhje uji dhe gazi lotsjellës.

Deputetja Flora Brovina kërkoi ndihmë mjekësore nga pasojat e hedhjes së këtij gazi.

Kryeprokurori Beka tha se hetimet nuk mund të pengohen nga imuniteti që kanë deputetët.

“Imuniteti nuk i përfshin ato veprime, pasi që dyshohet se vepra është kryer me mjete të cilat nuk guxon t’i posedojë asnjë person dhe as ata të cilët gëzojnë imunitetin,” tha kryeprokurori.

Po ashtu, Policia e Kosovës ka konfirmuar sot për Express se në bashkëpunim me prokurorinë kompetente kanë kryer hetimet për verifikimin e mjetit të dyshuar dhe pritet që në vijim të ndërmarrin veprimet e mëtutjeshme në bazë të vendimit të prokurorit kompetent. /Kallxo/