Kusari-Lila: 2014, vit i zhvillimit ekonomik për Gjakovën

Kandidatja për kryetare të Komunës së Gjakovës, Mimoza Kusari Lila ka siguruar qytetarët e Komunës së Gjakovës se do të punojë me përkushtim që nga 4 nëntori për përmirësimin e jetës së tyre.

“Nga tubimi në tubim ne po rritemi dhe çdo ditë e më shumë po e vërej se qytetarët e Komunës së Gjakovës me padurim po e presin datën 3 nëntor, ditën kur do t’i thonë po ndryshimit të madh për Gjakovën. Disa gazetarë po më pyesin se çfarë mendoj për deklarimet e ulëta të kryetarit aktual se do mbesë kalimtare e rastit. As unë e as mijëra të rinj që kemi kërkuar mundësinë e pa gjetur në Gjakovë në ndonjë vend tjetër nuk jemi kalimtarë, por lidhja jonë me Gjakovën është shumë herë me e madhe se sa deklaratat sipërfaqësore të tij. Në Komunën e Gjakovës së pari kompanitë nuk janë të sigurta ngase ato çdo ditë e më shumë shantazhohen dhe përballen me presione dhe haraç”, tha ajo.

Ajo tha se viti 2014 për Gjakovën do të jetë vit i aktiviteteve dhe angazhimeve të shumta për zhvillimin ekonomik të Gjakovës, duke zhvilluar dhe promovuar zonën e lirë ekonomike dhe Aeroportin e Gjakovës

“Ne do të krijojmë fonde për zhvillimin e bizneseve të reja, sistemin e grandeve për bizneset prodhuese, eliminimin e lejeve dhe licencave për bizneset e vogla dhe të mesme. Do fillojmë menjëherë me mbështetje institucionale për shoqatat e dala nga lufta, shoqatat e pensionistëve, shoqatat e personave me aftësi të kufizuara. Do të angazhohem që të depolitizojmë arsimin, institucionet shëndetësore, kulturore dhe sportive, si dhe pjesë e programit tonë është edhe promovimi i turizmit kulturor,historik dhe malor”, tha Kusari-Lila.