Ambasadorja e re kroate dorëzon kredenciale te Jahjaga

Presidentja e Republikës së Kosovës, zonja Atifete Jahjaga priti sot ambasadoren e re të Republikës së Kroacisë në Kosovë, zonjën Marija Kapitanoviq, e cila i dorëzoi letrat kredenciale.
Presidentja Jahjaga shprehu mirënjohjen për mbështetjen e pakursyer që institucionet dhe qytetaret e Republikës së Kroacisë i kanë ofruar qytetareve dhe institucioneve të Kosovës në të gjitha proceset nëpër të cilat ka kaluar vendi, transmeton Koha.net.
Sipas njoftimit, presidentja Jahjaga theksoi rëndësinë e thellimit bashkëpunimit dhe të marrëdhënieve midis dy vendeve, në çdo fushë me interes dypalësh, me theks në atë ekonomike.Ambasadorja e Republikës së Kroacisë në Kosovë, zonja Marija Kapitanoviq shprehu gatishmërinë e Qeverisë kroate për të vazhduar mbështetjen e fuqishme për Kosovën, sidomos në procesin e konsolidimit dhe anëtarësimit në institucionet ndërkombëtare dhe në proceset drejt integrimit në Bashkimin Evropian.