Amerikanët të interesuar për projekte të riciklimit dhe energjisë në Kosovë

Përfaqësues të kompanisë Ekobase Global, u pritën në një takim nga zv. Kryeministri/Ministri i Diasporës dhe Investimeve Strategjike. Z. Dardan Gashi, të cilin e njoftuan me planet për projekte konkrete në fushën e riciklimit të gomave të vjetra dhe energjisë së ripërtrishme.

Ekobase Global Inc. është kompani nga Shtetet e Bashkuara të Amerikës, me degë në disa shtete të Bashkimit Evropian.
“Ekobase Global Inc. është duke implementuar projekte të ngjashme edhe në Slloveni, Spanje ndërsa kemi dëshirë që të përfshijnë edhe Kosovën në këtë iniciativë që është duke marrë përmasa globale”, tha Tomaz Groff, drejtori i kompanisë për Evropë, duke shtuar se në Kosovë kanë ardhur për të shikuar edhe mundësi të tjera të investimit në fushën e energjisë së ripërtrishme.
Në anën tjetër, ministri Gashi, duke i falënderuar për vizitën, i informoi përfaqësuesit e kësaj kompanie lidhur me mundësitë të cilat ofrohen sipas Ligjit për Investimeve Strategjike.
“Ne momentalisht konsiderohemi si shteti më liberal për sa i përket mundësive të cilat u ofrojmë investitorëve që potencialisht kualifikohen si investitorë strategjik në fushën e minierave, energjisë dhe turizmit. Deri tani kemi marrë aplikacionin e parë në fushën e energjisë solare nga një kompani shqiptaro – gjermane, ndërsa presim së paku edhe 4 aplikacione në fushën e minierave”, tha ministri Gashi.
Në fund u dakorduan që në vizitën e ardhshme në Kosovë të diskutohen edhe modalitetet konkrete të projektit në fjalë.