Anëtari ndërkombëtar i Këshillit Drejtues të UP nuk ftohet në mbledhje

Kryetarja e Këshillit Drejtues të Universitetit të Prishtinës, Shefkije Islamaj, ka ftuar për të mërkurën në orën 16 mbledhjen e Këshillit me pikën e vetme të rendit të ditës “Shqyrtimi dhe marrja e vendimit lidhur me nismën e 28 anëtarëve të Senatit për shkarkimin e rektorit të Universitetit”.  Tetë anëtarët vendorë të Këshillit Drejtues janë të njoftuar me këtë nismë dhe e kanë marrë ftesën për pjesëmarrje në mbledhje. Për më tepër të hënën kanë marrë pjesë në mbledhje të përbashkët me senatorët, ku i kanë dëgjuar ankesat e këtyre të fundit ndaj rektorit Zejnullahu.

Por ftesa e as informata se rektorit mund të shkarkohet nuk i ka shkuar edhe anëtarit ndërkombëtar të Këshillit Drejtues, Sigurd Hoellinger, të emëruar në këtë organ nga ministri Arsim Bajrami. Në një prononcim eskluziv për “Zëri”, Hoellinger, i cili jeton në Vjenë, thekson se nuk ka mundur të merr pjesë në mbledhjet e mëhershme të Këshillit Drejtues për shkak të obligimeve të tjera,shkruan Zeri.info

“Nuk jam i informuar për takimin e radhës dhe nuk e di se çfarë është në rend dite”, ka deklaruar Hoellinger.   Po ashtu, Hoellinger pohon të mos jetë fare i informuar me nismën e senatorëve për shkarkimin e rektorit, prandaj thotë se nuk mund të prononcohet për këtë çështje.

Sipas nenit 6, pika 7 e Rregullores së Punës të Këshillit Drejtues, njoftimi për mbledhje duhet t’iu dërgohet anëtarëve të Këshillit Drejtues të paktën tri ditë para mbajtjes së mbledhjes. Ndërkaq, ftesa për mbledhjen e radhës është dërguar vetëm një ditë para mbajtjes së mbledhjes dhe, si duket, nuk i është dërguar të gjithë anëtarëve të Këshillit Drejtues.

Mbetet pyetja pse anëtari i vetëm ndërkombëtar i organit më të lartë të Universitetit mbahet i painformuar për një nismë aq të rëndësishme çfarë është shkarkimi i rektorit dhe nuk ftohet, në mënyrë të rregullt, në mbledhjen të këtij organi ku do të merret vendimi për këtë nismë?/ZËRI