Agjencia e lajmeve Kosovanews kosovanews.info
Bashkimi Evropian ndërpreu sot aplikimin e disa prej sanksioneve kundër Bjellorusisë, duke konfirmuar një përmirësim të marrëdhënieve me këtë vend pas lirimit të të burgosurve politikë nga presidenti Aleksander Lukashenko.
Ndërprerja e sanksioneve, për një periudhë katër mujore, përfshin 170 persona, të ardhurat e të cilëve ishin ngrirë në BE dhe ishin privuar nga vizat, si dhe tre entitete, të ardhurat e të cilëve ishin bllokuar gjithashtu.
“Vendimi u mor në përgjigje të lirimit të të gjithë të burgosurve politikë bjellorus më 22 gusht dhe në kuadër të përmirësimit të marrëdhënieve mes BE-së dhe Bjellorusisë”, theksoi Këshilli i BE-së në një komunikatë.
Kjo ndërprerje e sanksioneve duhet të inkurajojë zhvillime të tjera pozitive”, shtoi Këshilli, ndërkohë që BE-ja do të vazhdojë të mbikëqyrë nga afër situatën e demokracisë dhe të të drejtave të njeriut në Bjellorusi.
Sipas burimeve diplomatike, Aleksander Lukashenko bën pjesë në 170 personat e përfshirë në vendimin e ri. Emrat e këtyre personave do të publikohen zyrtarisht në faqen zyrtare të Bashkimit Evropian.
BE-ja ka kërkuar që prej shumë kohësh që Lukashenko, i cilësuar si ”diktatori i fundit” në Evropë nga Uashingtoni, t’i lirojë të burgosurit politikë.
Në pushtet që prej vitit 1994, ai u rizgjodh për herë të pestë më 13 tetor me 83,49 për qind të votave.