Agjencia e lajmeve Kosovanews kosovanews.info
Ministri i Integrimeve Evropiane i Kosovës Bekim Çollaku, në një shkrim ekskluziv për gazetën “New Europe”, i bën një analizë raporteve të Kosovës me Bashkimin Evropian, me theks mbi zhvillimet rreth liberalizimit të vizave për qytetarët e vendit.
Në tekstin, të cilin KosovaPress po e transmeton të plotë, ministri, mes tjerash, përkujton se Kosovës, së bashku me pjesën tjetër të rajonit, i është premtuar integrimi evropian që në vitin 2000.
Në vazhdim shkrimi i Çollakut dhe linku për tekstin origjinal:
Fjala gjermane “Wanderlust” – përkthehet përafërsisht si “një dëshirë e madhe për të udhëtuar”
Shumica e gjuhëve tjera nuk kanë një fjalë ekuivalente për ta përkthyer këtë fjalë nga gjermanishtja. Në Kosovë, jo vetëm që mund të mos përkthehet si një fjalë e vetme, por është duke u bërë e vështirë për ta përkthyer fare kuptimin e saj. Pyes veten nëse pas dekadave të politikave kufizuese të vizave, a është mundur që dikush të ndjen “wanderlust” në Kosovë, dhe sidomos një wanderlust që do të përfshinte vendet e BE-së.
Nëse po, hapat e parë drejt përmbushjes së dës hirës për udhëtim përfshijnë plotësimin e një aplikacioni për vizë dhe sigurimin e dokumenteve të mjaftueshme mbështetëse për të mbuluar dyshemenë e një dhome të një madhësie mbi mesatare. Procesi nuk përfundon me kaq. Duhet shtuar edhe humbjen e disa ditëve të punës për të dorëzuar ato dokumente dhe duke dhënë intervista për zyrtarët konsullorë në ambasada të ndryshme të vendeve anëtare të BE-së, disa prej të cilave janë të vendosura edhe në vendet fqinje.
Në fund të luftës në vitin 1999, ne u çliruam. Nëse dikush do të më thoshte se pas gjashtëmbëdhjetë vjetëve qytetarët e Kosovës nuk do të mund të udhëtojnë lirshëm në vendet e BE-së, unë do të kisha vënë në pikëpyetje nëse kanë një mendje të shëndoshë. Në vitin 2008, pasi ne shpallëm pavarësinë, mirëpritëm vendosjen Misionit të Sundimit të Ligjit, misionit më të madh të BE-së të vendosur ndonjëherë me kompetenca ekzekutive. Por ja ku je mi, në fund të vitit 2015 dhe ende po e kërkojmë të njëjtën gjë.
Kosovës, së bashku me pjesën tjetër të rajonit, i është ofruar premtimi për integrim evropian në fillim të viteve 2000. Këtë vit ne arritëm të nënshkruajmë Marrëveshjen e Stabilizim Asociimit me BE-në, pavarësisht se pesë shtete anëtare ende nuk e kanë njohur Kosovën. Kjo është bërë duke u bazuar në një agjendë të reformave të brendshme. Ne gjithashtu morëm një sërë vendimesh shumë të vështira, duke përfshirë ngritjen e një gjykate të specializuar për të hetuar krimet e dyshuara të luftës dhe zbatuar marrëveshje të reja në funksion të normalizimit të marrëdhënieve me Serbinë.
Nënshkrimi i MSA ishte një moment historik për procesin e integrimit të Kosovës në BE, por që procesi me të vërtetë të jetë i prekshëm, qytetarët e vendit duhet të sigurohen se perspektiva e anëtarësimit është reale.
Pavarësisht që kemi një shoqë ri që është jashtëzakonisht mbështetëse ndaj integrimit evropian, shumë shpesh po takoj njerëz të rinj të cilët më pyesin se si ne mund të flasim për të ardhmen e tyre evropiane, kur ata nuk mund edhe të udhëtojnë dhe të shohin BE-në.
Prej shumë viteve shokët e tyre nga rajoni mund të udhëtojnë lirisht, dhe unë nuk mund të fajësoj ata.
Pra, çfarë dhe pse është duke marrë kaq shumë kohë për Kosovën?
Një arsye është se pavarësisht nga qëllimi i Kosovës që të fillojë më herët, ne morëm udhërrëfyesin për liberalizimin e vizave nga Komisioni Evropian në vitin 2012, katër vite pas vendeve tjera të rajonit, dhe me dyfish më shumë kritere. Një listë e gjatë e shpjegimeve janë dhënë se pse kriteret u zgjeruan.
Për të shkurtuar një histori të gjatë, ne nuk jemi dekurajuar dhe kemi rënë dakord që me përkushtim të adresojmë çdo kriter, sepse kemi besuar se reformat do të ishin të mira për vendi n tonë dhe përfundimisht do të arrijmë përmbushjen e dëshirës së qytetarëve tanë që të udhëtojnë lirisht dhe pa viza.
Por tani, gati katër vite në kuadër të dialogut për liberalizimin e vizave ne besojmë se Kosova është e gatshme.
Ne kemi themeluar dhe funksionalizuar mekanizmat institucionalë për të adresuar të gjitha rekomandimet e Komisionit. Në Qershor ne dorëzuam raportin tonë të tretë dhe të fundit të gatishmërisë dhe këtë muaj pritet publikimi i vlerësimit të tretë nga Komisioni. Ishte e vështirë për të arritur këtu, por sot ne kemi politika më të mira dhe që të parandalojnë migracionin ilegal, forcojmë kontrollet kufitare, sigurinë e dokumenteve, kemi përmirësimin e sigurisë së brendshme dhe përgjithësisht kemi një sektor të rendit dhe ligjit më të reformuar.
Ne jemi të bindur se kemi përmbushur të gjitha detyrimet tona.
Një tjetër element i rëndësishëm që do të peshojë mbi vlerë simin e BE-së nëse Kosova është e gatshme për liberalizimin e vizave është ndikimi i mundshëm i migracionit. Ne patëm një rritje të migruesve të paligjshëm dimrin e kaluar, por ne kemi punuar shumë në adresimin e kësaj sfide. Nga disa qindra migrues të paligjshëm që largoheshin nga Kosova çdo ditë në dhjetorin dhe janarin e kaluar, në saje të masave që kemi ndërmarrë numri është reduktuar afër zeros.
Deri në fund të vitit 2015 ne presim të riatdhesojmë rreth 20.000 qytetarë, afërsisht 400% më shumë se vitin e kaluar.
Kriza aktuale e refugjatëve është e kuptueshme që është duke i bërë të gjithë në Bashkimin Evropian më të kujdesshëm në lidhje me kontrollin e kufijve dhe lëvizjen e tyre në BE. Por, kredibiliteti i BE-së do të dëmtohet nëse papritmas ndryshohen rregullat; dhe kosovarët, mijëra prej të cilëve kanë qenë refugjatë vetë, nuk duhet të jenë viktimë e një dëmi kolateral si rezultat i sfidave qà « po i përjeton BE.
Kjo është një çështje shumë emocionale për qytetarët e vendit tim që duan të shohin rezultatet e para të prekshme të përkushtimit dhe aspiratës për integrim në BE, duke qenë në gjendje që thjesht të udhëtojnë në BE.
Kosova është e gatshme për liberalizimin e vizave. Të gatshëm janë edhe qytetarët e saj.
Ky shkrim është shkruar ekskluzivisht për “NewEurope” nga ministri
Çollaku.
http://neurope.eu/article/