Daka: Presim zgjedhje demokratike

Kryetarja e Komisionit Qendror të Zgjedhjeve (KQZ), Valdete Daka, ka shprehur optimizëm se zgjedhjet lokale të 3 nëntorit do të jenë të lira dhe demokratike. Ajo ka thënë se për mbarëvajtjen e këtij procesi janë të angazhuar rreth 17 mijë vëzhgues vendorë e ndërkombëtarë, të cilët do ta monitorojnë procesin zgjedhor.

“Presim që procesi zgjedhor i 3 nëntorit do të jetë i rregullt dhe demokratik. Për të pasur një proces të mirëfilltë të gjithë duhet të japin kontribut, duke përfshirë këtu qytetarët, komisionarët, vëzhguesit si dhe partitë politike. Mbarëvajtjen e procesit të zgjedhjeve lokale të 3 nëntorit do ta monitorojnë rreth 17 mijë vëzhgues vendorë e ndërkombëtarë”, ka thënë Daka për “Epokën e re”.

Ajo ka bërë me dije se KQZ-ja i ka bërë të gjitha përgatitjet e nevojshme për një proces të rregullt e demokratik. Por, sipas saj, tani u mbetet partive politike të kontribuojnë në mënyrë që të mos devijojë procesi zgjedhor i 3 nëntorit.

“Sa i përket KQZ-së, i kemi bërë të gjitha përgatitjet e duhura. Zgjedhjet janë komplekse dhe nuk varet i tërë procesi vetëm nga KQZ-ja, por nga të gjithë pjesëmarrësit. Kështu që, të gjithë duhet ta japin kontributin e vet, në veçanti partitë politike”, ka deklaruar Daka, duke u bërë thirrje partive politike të tregojnë vetëdijesim dhe pjekuri politike.

“Shpresojmë shumë që partitë politike kësaj radhe janë vetëdijesuar. Nuk do të ishte mirë që mangësitë e proceseve të tjera të përsëriten edhe më 3 nëntor. Subjektet politike më 3 nëntor duhet të tregojnë pjekuri të lartë politike”, ka theksuar Daka.

Në këtë kontekst, ajo ka kërkuar nga partitë politike ta vazhdojnë edhe më tutje fushatën e ndershme, e cila do të kontribuojë që procesi të jetë i rregullt. Daka ka vlerësuar se respektimi i rregullave dhe ligjeve nga subjektet politike është në funksion të zgjedhjeve demokratike dhe në funksion të asaj që të fitojnë qytetarët dhe shteti i Kosovës.

Ndërsa duke i komentuar akuzat lidhur me numrin e vogël të votuesve për zgjedhjet lokale të 3 nëntorit, Daka ka deklaruar se ekstraktin dhe regjistrin civil e mirëmban Ministria e Punëve të Brendshme (MPB), e jo KQZ-ja.

“KQZ-ja e merr ekstraktin nga MPB-ja. Pra, neve qysh na vjen ekstrakti ashtu e marrim. MPB-ja i mirëmban ekstraktin dhe regjistrin civil”, ka deklaruar Daka. Kurse sa i përket kërkesës së Serbisë, që komuniteti serb të jetë i përfaqësuar në KQZ edhe më një zëvendëskryetar, Daka ka thënë se një kërkesë e tillë është e panevojshme, pasi Kushtetuta e Kosovës e rregullon përbërjen e KQZ-së.

“Përbërja e KQZ-së është e rregulluar me Kushtetute. Nuk më interesojnë kërkesat e zyrtarëve serbë. Një kërkesë e tillë është e panevojshme. Përbërja e KQZ-së nuk varet as prej meje e as prej të tjerëve, por prej Kushtetutës së Republikës së Kosovës”, ka deklaruar Daka.