De Biasi: Lojtarët kosovarë mbesin me Shqipërinë

Gianni De Biasi, ka deklaruar se lojtarët që vijnë nga Kosova, do të vazhdojnë të luajnë për Kombëtaren e Shqipërisë, edhe kur Federata e Futbollit të Kosovës të pranohet në UEFA dhe FIFA.

De Biasi ka thënë se ka biseduar me drejtuesit e FFK-së dhe ata nuk janë të interesuar t’i rikthejnë lojtarët kosovarë që luajnë për Shqipërinë, pasi kanë një projekt tjetër, transmeton Mapo.

“Unë kam biseduar personalisht me drejtuesit e FFK-së dhe më kanë thënë se Kosova nuk e ka ndërmend t’i marrë lojtarët që kanë luajtur për Shqipërinë. Mendoj se në këtë pikë, nuk do të ketë probleme. Mendoj se Federata e Kosovës dëshiron ta bëjë një projekt me lojtarë të rinj, me perspektivë, për të bërë mirë në të ardhmen”, nënvizoi De Biasi

Mirëpo, tekniku italian theksoi se ata që duan të largohen me vetëdëshirë nuk do të pengohen, siç ishte edhe rasti i Ujkanit, që tashmë luan për Kosovën.