ENEMO, “syri kritik” i zgjedhjeve në Kosovë

ENEMO prezantoi sot planin për vëzhgimin e zgjedhjeve në Kosovë. Sipas një njoftimi për medie, dje në Prishtinë kanë arritur vëzhguesit afatshkurtër, të cilët kanë marrë udhëzime mbi ambientin politik, specifikat e procesit zgjedhor, kodin e mirësjelljes së vëzhguesve, legjislacionin e zgjedhjeve dhe aspekte të tjera të rëndësishme për procesin e vëzhgimit.

Vëzhguesit afatshkurtër do të grupohen me vëzhguesit afatgjatë, të cilët janë të shpërndarë në gjashtë komuna që nga fillimi i tetorit. Në ditën e zgjedhjeve, ENEMO do të ketë 34 vëzhgues të ndarë në 17 ekipe afatshkurtra, të cilat do të vëzhgojnë hapjen e vendvotimeve, gjendjen gjatë votimit në vendvotime, ambientin rreth vendvotimeve dhe numërimin e votave. Ekipe vëzhguese afatshkurta  të ENEMO do të mbulojnë rreth 10% të numrit të përgjithshëm të vendvotimeve në Kosovë, thuhet në njoftim. Për më tepër, vëzhguesit do të përcjellin bartjen e materialeve nga vendvotimet tek komisionet komunale te zgjedhjeve dhe sjelljen e KKZ‐ve. Fokusi I vëzhgimit do të jetë vlerësimi i punës së trupave administrativë të zgjedhjeve, votimit, numërimit dhe identifikimit të parregullësive dhe manipulimeve që mund të ndodhin në ditën e zgjedhjeve.

ENEMO paralajmëron se  të gjeturat e veta do t’i  paraqes në raportin preliminar,  të cilin do ta prezantojë të martën, me 5 nëntor, në orën 13.00 në Qendrën Informative Kulturore të BE në Prishtinë.

Misioni i ENEMO‐s kryesohet nga Zlatko Vujoviq, presidenti i Bordit të CEMI, Qendra për Monitorim dhe Hulumtime në Mal të Zi.

ENEMO është një grup që përbëhet nga 22 organizata civile nga 17 shtete të ish-Bashkimit Sovjetik dhe të Evropës Qendrore e Lindore. Këto organizata jo politike janë grupet udhëheqëse të monitorimit të zgjedhjeve vendore në vendet e tyre.

ENEMO ka vëzhguar Zgjedhjet Lokale 2009 dhe Zgjedhjet e Parlamentare  2010 në Kosovë