Film për jetën e Susan Boyle

Menjëherë pas lajmit se Susan Boyle do të jetë britanikja e parë që do të bëjë duet (pasvdekjeje) me Elvis Prelseyn, vjen një tjetër informatë për këngëtaren.

Njoftimet më të reja thonë se do të xhirohet një film rreth jetës së sensacionit të spektaklit “Britain’s Got Talent”.

“Janë duke u zhvilluar plane në atë drejtim, por do të ndodhë pakëz më vonë”, citon BBC Newsbeat fjalët e 52-vjeçares.

Boyle fitoi famë botërore pas paraqitjes në spektaklin britanik për talentë në prill të vitit 2009, kur performoi këngën “I Dreamed a Dream” nga “Les Miserables”.

Megjithatë, edhe pse u bë sensacion botëror, ajo zuri vendin e dytë në “Britain’s Got Talent” (vendi i parë i takoi trupës së vallëzimit “Diversity”).

Në nëntor të vitit 2009, ajo lansoi albumin e parë me titull “I Dreamed a Dream”, i cili asokohe u bë albumi më i shitur në Britani të Madhe.