Fushata elektorale e partive politike është duke reflektuar në punën e kuvendit të Kosovës, madje duke vënë në pikëpyetje funksionimin edhe të komisioneve. Nisur nga seancat e kaluara kur është bllokuar çdo nismë për shkak të mungesës së deputetëve, kryesia e Kuvendit në mbledhjen e saj të radhës ka vendosur që të martën të ketë një konsultë me të gjithë shefat e grupeve parlamentare lidhur me seancën e rregullt e cila është paraparë të mbahet më 24 tetor.
Vetë kreu i kuvendit Jakup Krasniqi ka alarmuar për ngecjet në punën e kuvendit përderisa ka theksuar se është pro mbajtjes së seancës së Kuvendit. I pyetur nga standardi info rreth mbajtjes së seancave të Kuvendit, derisa është duke u mbajtur fushata elektorale për zgjedhjet lokale të 3 nëntorit, Krasniqi ka thënë se personalisht mendon se duhet të mbahet séanca. “Seancat duhet të mbahen, pasi pikat e rendit të ditës duhet të përfundojnë.
Madje, tani është një ngecje, jo vetëm të seancave, por edhe të komisioneve parlamentare”, ka thënë Krasniqi. Nisur nga kjo gjendje sipas tij në Kryesi janë marr vesh që të zhvillojnë një konsultë të martën me shefat e Grupeve Parlamentare, pastaj për të vendosur për t’u mbajtur seancat apo jo. “Ne do ta kemi edhe një konsultë nesër me kryetarët e Grupeve Parlamentare, pasi ata janë ata që e dinë nëse deputetet vijnë në seancë apo jo, pastaj duhet ta thërrasim seancën me 24 tetor”, ka thënë Krasniqi.