Haradinaj, me deklaratë për protestën e djeshme

Kryetari i Aleancës për Ardhmërinë e Kosovës, Ramush Haradinaj nëpërmes një deklarate për media ka vlerësuar protestën e mbajtur dje nga tri partitë opozitare.
Sipas tij protesta e djeshme ka qenë madhështore dhe paqësore e cila në vete përmban disa mesazhe.
Deklarata e Haradinajt:
“I pari dhe më i rëndësishmi është se qytetarët e Kosovës nuk dëshirojnë që të vazhdojnë ta tolerojnë shkeljen e Kushtetutës dhe indiferencën ndaj integritetit territorial, keqqeverisjen, nepotizmin, korrupsionin dhe papërgjegjësinë institucionale.
Ata, po ashtu, treguan se ky është vendi i tyre dhe aktivisht dëshirojnë ta ndërtojnë të ardhmen e vet.
Protesta e djeshme tregoi se qytetarët e Kosovës e duan demokracinë e vet dhe, përkundër çfarëdo vështirësie, besojnë se demokracia do të funksionojë në Kosovë.
Unë jam ndier i lumtur dhe krenar me popullin e Kosovës, edhe pse e di se ende na pret rrugë për ta bërë Kosovën ashtu siç duhet.
Integrimi në Unionin Evropian dhe në NATO është caku i popullit tonë dhe ne të gjithë duhet ta kemi të qartë se angazhimi i secilit prej nesh është i domosdoshëm.
Unë sot i thërras të gjithë qytetarët e Kosovës, e thërras shoqërinë civile, botën akademike dhe të gjithë veprimtarët e hershëm dhe aktual, të cilët janë angazhuar me vite e dekada që Kosova të arrijë këtu ku është, që edhe njëherë ta japin kontributin e tyre për zhvillimin e demokracisë sonë dhe arritjen e synimeve madhore për shtetin tonë. Sot duhet që të gjithë njerëzit të angazhohen, jo vetëm me zemër, por edhe me mendje!
Unë jam i vetëdijshëm se askush dhe asgjë nuk është perfekt në Kosovë. Por, sot është koha që të bëhet dallimi. Jam, po ashtu, i vetëdijshëm se ashtu siç nuk ka ndodhu r askund më parë, as në Kosovë nuk do të ndodh që në një ditë të vetme të zgjohemi dhe gjithçka të jetë në rregull përnjëherë. Por, dështimi për ta kuptuar se ndryshimi sot do të jetë një hap i madh drejt asaj dite, do ta lë vendin edhe për një kohë të gjatë pa shpresë dhe në agoni.
Ju ftoj të gjithëve, pavarësisht bindjeve politike ose ideologjike, pavarësisht paragjykimeve apo historive personale, që të bëheni pjesë e ndryshimit pozitiv në Kosovë”.