Haradinaj: Vitin e kthesës do ta filloj me homazhe te varri i Adem Jasharit

Kreu i AAK-së, Ramush Haradinaj, thotë se këtë vit, të cilin po e quan vit të kthesës, do ta fillojë me homazhe te varri i komandantit legjendar Adem Jashari.
“Dua që me këtë veprim simbolik, timin dhe të bashkëpunëtorëve të mi, edhe njëherë t’i përulemi heroizmit të tij e të familjes Jashari, e me këtë edhe gjithë të tjerëve që ranë për lirinë e Kosovës”, ka thënë Haradinaj.

“Është flijimi dhe sakrifica e mijëra qytetarëve por edhe amaneti i qindra i figurave të ndritura të kombit, në mesin e të cilave është edhe figura emblematike e Adem Jasharit, që sot na obligojnë ta ruajmë e ta zhvillojmë shtetin për të cilin ata jetuan dhe ranë. Askush nuk mundet që ta zhvlerësojë e ta zhbëjë atë që është arritur me aq shumë sakrificë”, ka thënë Haradinaj.