Isa Mustafa: Asociacioni vetëm në pajtim me Kushtetutën, ndryshe jo

Pas raundit të sotëm të bisedimeve ndërmjet Kosovës dhe Serbisë në Bruksel, kryeministri kosovar, Isa Mustafa ka thënë se është biseduar për implementimin e marrëveshjeve të mëparshme, si dhe për marrëveshjen për Asociacionin e komunave me shumicë serbe. Sipas Mustafës, Asociacionin mund të themelohet vetëm në pajtim me vendimin e Gjykatës Kushtetuese të Kosovës.
“Asgjë nuk do të funksionojë në Kosovë përveç nëse nuk është në pajtim me vendimet e Gjykatës Kushtetuese”, ka thënë Mustafa pas takimit,
Kur bëhet fjalë për zgjedhjet e parakohshme parlamentare të Serbisë, Mustafa ka thënë se ato mund të mbahen në territorin e Kosovës vetëm në pajtim me ligjet e Kosovës.
“Do të respektojmë të drejtën e serbëve për të votuar, por në pajtim me ligjet e Kosovës”, ka thënë ai.
Sipas tij, sonte nuk është arritur marrëveshje për kurrfarë afatesh për fillimin e punës për statutin e Asociacionit.