Italia do bashkëpunim me Kosovën në luftë kundër terrorizmit

Roberta Pinotti, ministre e Mbrojtjes e Italisë, ka qëndruar të hënën në Kosovë, gjatë së cilës vizitë është pritur nga autoritetet më të larta, presidenti Hashim Thaçi e kryeministri Isa Mustafa.
Të dyja takimet i ka dominuar çështja e luftës kundër terrorizmit, shkruan sot Koha Ditore.
Nuk ka pasur deklarime për media pas këtyre takimeve, por mbështetur në komunikatat e shtypit që kanë lëshuar Presidenca e Qeveria, ministrja Pinotti ka shprehur nevojën për bashkëpunim në luftën kundër terrorizmit.
“Duke folur për arritjet në fushën e sigurisë, presidenti Thaçi tha se falë masave që kanë marrë autoritetet kosovare, në gjashtë muajt e fundit nuk është regjistruar asnjë kosovar i ri që u është bashkuar grupeve terroriste në Siri dhe Irak”, thuhet në komunikatën e Presidencës.
Në anën tjetër, sipas komunikatës së Qeverisë, në takimin me kryeministrin Mustafa është biseduar për fuqizimin e vazhdueshëm të sektorit të sigurisë në Kosovë dhe për rezultatet konkrete në këtë drejtim.