Agjencia e lajmeve Kosovanews kosovanews.info
Presidentja e Kosovës, Atifete Jahjaga ka ftuar serbët e veriut që të dalin në zgjedhjet e balotazhit më 1 dhjetor. Në një intervistë për Agjencinë Beta, Jahjaga tha se me votën e tyre serbët e veriut dëshmuan përcaktimin e tyre për të ndërtuar një të ardhme të përbashkët në Republikën e Kosovës, në drejtim të integrimeve evropiane.
Fillimisht presidentja Jahjaga ka vlerësuar se Kosova tashmë ka hyrë në fazën e stabilitetit politik. Kjo, sipas Jahjagës, është bërë duke vendosur marrëdhënie normale mes qytetarëve të bashkësive të ndryshme nacionale, ndërsa po punohet edhe më tej për ndërtimin e besimit midis qytetarëve serbë në veri.
Me zgjedhjet e 3 nëntorit, tha Jahjaga është treguar një pjekuri politike dhe shkallë e lartë e kulturës demokratike.
”Presim që edhe raundi i blotazhit të kalojë në nivel të njëjtë demokratik dhe të rregullt”, ka thënë Jagjaga, transmeton RTK.
”Incidente që kanë ndodhur në veri nuk mund të prishin përshtypjen e mirë për zgjedhje të lira dhe demokratike. Serbët janë qytetarë të Kosovës edhe në veri edhe në jug dhe me daljen në zgjedhje kanë dëshmuar se dëshirojnë të jetojnë dhe integrohen në institucionet e Republikës së Kosovës”, ka theksuar Jahjaga.
Më tej, presidentja Jahjaga ka vlerësuar se Marrëveshja e 19 prillit, ka hapur rrugë për zgjidhjen e të gjitha problemeve ndër-fqinjësore, por ka shtuar se ajo do të marrë kuptimin e vërtetë vetëm kur të zbatohet në tërësi pikë për pikë.
Presidentja ka theksuar se Kosova tashmë është realitet në Evropë dhe e pranuar nga më shumë se 100 shtete dhe e anëtarësuar edhe në institucione të rëndësishme ndërkombëtare financiare.
Kosova ka nënvizuar ajo, e ka rrugën e hapur drejt integrimeve evropiane ashtu si çdo shtet tjetër i Evropës juglindore. Jahjaga ka theksuar gjithashtu se rruga e vetme e zgjidhjes së problemeve midis Kosovës dhe Serbisë është dialogu.
”Ka përfunduar periudha e luftës dhe hegjemonisë dhe e vetmja rrugë që ka mbetur është rruga e dialogut”, ka thënë Jahjaga.