Januzaj gjatë verës mund të kalojë tek Evertoni

Mesfushori kosovar Adnan Januzaj mund të transferohet te skuadra e Evertonit gjatë kësaj vere, shkruajnë mediumet në Angli.
Siç njoftojnë ato, Januzaj mund të jetë futbollist ideal për projektin e trajnerit të Evertonit, Roberto Martinez, për edicionin e ardhshëm.
“I riu thuhet se është në sy të keq në ‘Old Trafford’, por mund të jetë ideal për trajnerin e Evertonit Roberto Martinez. Everton pritet ta bëjë këtë lëvizje për të nënshkruar me Adnan Januzajn këtë verë. Januzaj së bashku me lojtarin tjetër të ri Andreas Pereira nuk kanë luajtur për ekipin e parë në dy javët e fundit, pasi kanë zhgënjyer në një lojë të U-21 të Manchester United kundër Middlesbrough muajin e kaluar. Kjo e ka shqetësuar trajnerin e ekipit të parë Louis van Gaal që ka ftohur marrëdhëniet me Januzajn”, shkruan “hitc.com”.
Januzaj 21-vjeçar me skuadrën e Manchester United ka kontratë deri në verën e vitit 2018. Ai gjashtë muajt e parë të këtij edicioni ishte i huazuar te skuadra gjermane, Borussia Dortmund. Por, në janar të këtij viti u kthye sërish tek Unitedi.
Këtë edicion reprezentuesi i Belgjikës me ekipin e parë të Manchester Unitedit ka luajtur vetëm katër ndeshje, ku ka shënuar një gol. Me dy gola dhe një asistim në gjashtë ndeshje ka kontribuar edhe për ekipin U-21 të Unitedit.