Kadriu: Asociacioni e dëmton në mënyrë drastike Gjilanin (Foto)

Nënkryetari i komunës së Gjilanit, Rexhep Kadriu, i cili është edhe kryetar i degës së AAK-së në Gjilanë, ka thënë në manifestimin e opozitës që po mbahet në qytetin e Gjilanit përmes së cilës po kundërshtohet marrëveshja për Asociacionin e komunave me shumicë serbe dhe asaj për Demarkacionin kufitar me Malin e Zi se sot kur duhet të diskutohej për të arriturat, qytetarët janë detyruar të dalin në rrugë.

“Sot Gjilani manifeston me dinjitet për ruajtjen e integritetit territorial të Kosovës. Në vend që sot të diskutojmë për të arriturat tona, jemi detyrua të dalim në shesh për ti thënë jo dy marrëveshjeve që cenojnë integritetin e Kosovës. Ne gjilanasit gjithmonë kemi reaguar kur është cenuar territori ynë. Asociacioni e dëmton në mënyrë drastike Gjilanin sepse jemi të rrethuar me tri komuna serbe dhe nuk e pranojmë këtë”, tha ai.