KMDLNj: Presidente, mos e dekreto Selvete Gërxhaliu–Krasniqin

Këshilli për Mbrojtjen e të Drejtave e të Lirive të Njeriut ka kërkuar nga presidentja e Kosovës të mos e dekretojë Selvete Gërxhaliu – Krasniqi për gjyqtare të Gjykatës Kushtetuese për shkak se ajo ka qenë kandidate e LDK-së për deputete dhe zgjedhja e saj do të ishte në kundërshtim me moralin, jo korrekte, konflikt interesi dhe interferim i drejtpërdrejtë politik.

KMDLNj thotë se nuk e konteston profesionalizmin e Selvete Gërxhaliu – Krasniqi por e konteston sfondin ekskluzivisht politik dhe partiak të votimit të saj.

Ja komunikata e plotë e KMDLNj-së:

Më në fund, pas shumë “ vuajtjeve “, Kuvendi i Kosovës (pa opozitën) votoi dy kandidate për gjyqtare të Gjykatës Kushtetuese emrat e të cilave do të dërgohen për dekretim te presidentja e Kosovës, Atifete Jahjaga.

KMDLNj kishte monitoruar procesin e përzgjedhjes së kandidatëve për Gjykatë Kushtetuese, që nga faza e konkurimit, deri te votimi në Kuvendin e Kosovës. Muaj më parë ndonëse pati kandidatë shumë profesionist pati dështuar zgjedhja e gjyqtarëve të GJK pikërisht shkaku se kandidatët e preferuar partiakë nuk kishin marrë vota të mjaftueshme gjatë votimit në Kuvendin e Kosovës. Në këtë kontekst, KMDLNj pati reaguar duke kërkuar kritere për zgjedhjen e gjyqtarëve për Gjykatën Kushtetuese e që do të bëhej vetëm pas ndryshimit të Ligjit për Gjykatën Kushtetuese. Në këtë mënyrë do të vlerësohej profesionalizmi dhe përvoja në fushën përkatëse, si kriter përcaktues, paanësia, pavarësia në marrjen e vendimeve, edhe si individ edhe si Gjykatë e që nënkupton eliminimin e ndikimit politik në vendimet e Gjykatës Kushtetuese. Për KMDLNj-në ka qenë dhe është e papranueshme që të zgjidhet gjyqtar i Gjykatës Kushtetuese kandidati që nuk ka përvojë gjyqësore as edhe një ditë të vetme apo që në jetën e tij/saj profesionale nuk e ka shkruar apo nuk e ka shqyrtuar edhe një vendim të vetëm gjyqësor.

KMDLNj ka qenë dhe është kundër politizimit të Gjykatës Kushtetuese në ndërkohë që në dy votimet ( ai i parafundit që dështoi dhe ky i fundit që duhet të përsëritet) është përpjekje për të ndikuar politikisht në punën e Gjykatës përmes votimit të kandidatëve puro politik e që kanë qenë kandidat për zgjedhje për deputetë në zgjedhjet e fundit. Selvete Gërxhaliu – Krasniqi ka qenë kandidate e LDK-së për deputete prandaj zgjedhja e saj gjyqtare e Gjykatës Kushtetuese do të ishte në kundërshtim me moralin, jo korrekte, konflikt interesi dhe interferim i drejtpërdrejtë politik. Një kandidat që llogaritej i afërt apo pjesë e PDK-së, po në këtë garë konkurrimi për gjyqtarë të Gjykatës Kushtetuese ndonëse në garën paraprake llogaritej si njëri ndër favoritët, ndershmërisht hoqi dorë nga intervistimi pikërisht se përfolej se është kandidat i një subjekti të koalicioni qeveritar – PDK-së.Kështu do të duhej të vepronte edhe znj. Selvete Gërxhaliu – Krasniqi.

KMDLNj nuk ka informacione se kandidatja Gresa Cakaj – Nimani ka qenë anëtare apo ka pasur post në një subjekt politik por, sa i përket aspektit profesional ajo është e pakontestueshme dhe më e kompletuar dukshëm se kandidatët tjerë.

Për këtë arsye, KMDLNj kërkon nga presidentja e Kosovës të mos e dekretojë znj .Selvete Gërxhaliu – Krasniqi për gjyqtare të Gjykatës Kushtetuese pikërisht se votimi është mbështetur politikisht dhe partiakisht dhe në një mënyrë është ditur epilogu i votimit (në raundin e dytë) duke i diskriminuar kandidatët tjerë të cilët kanë shërbyer vetëm si numra për përmbushjen e aspekteve procedurale e që do të garantonte rregullsinë e procesit, që nga konkurrimi deri te votimi.

KMDLNj nuk e konteston profesionalizmin e znj. Selvete Gërxhaliu – Krasniqi por e konteston sfondin ekskluzivisht politik dhe partiak të votimit të saj.