Kosova, i vetmi vend në Europë me shtim natyror të popullsisë me mbi 1 për qind

Në Evropë po ka më shumë vdekje se lindje, ndërsa Kosova është vendi i vetëm në kontinentin e vjetër që ka shtim natyror të popullatës me më shumë se 1 për qind në vit.

Në një artikull në “Population and Development Review”, kryesuesi i autorëve Kenneth Johnson i Universitetit New Hampshire ka thënë se “në Evropë sot nuk ka shtim natyral të popullsisë”.

“Është vetëm një shtet – Kosova, me shtim natyral me më shumë se 1 për qind në vit”, ka theksuar Johnson.

17 shtete të Evropës janë duke përjetuar rënie të shtimit natyral të popullsisë duke përfshirë Gjermaninë, Italinë dhe Rusinë.

Rënia e shtimit natyral nuk nënkupton që një shtet është në rrezik të zhdukjes, por shkakton probleme të mëdha ekonomike. Popullata “plaket” dhe më pak njerëz mbesin të aftë për punë.

Harta më poshtë tregon ndryshimet në popullatë mes viteve 2000 deri 2010. Ngjyra e kaltër tregon rritjen në popullsi, ndërsa e portokallta rënien në shtimin natyral. E bardha tregon se ato vende nuk kanë të dhëna.