Agjencia e lajmeve Kosovanews kosovanews.info
Edhe nesër pritet të ketë përplasje mes pozitës dhe opozitës lidhur me vazhdimin e punës së Kuvendit. Pavarësisht kësaj, Kryesia ka paralajmëruar mbledhjen e radhës për të hënën në ora 11. Aty diskutohen 33 pika të ndryshme të cilat procedohen për seancën e Parlamentit, e cila pritet të mbahet në fund të javës së ardhshme
Kryesia e Kuvendit mblidhet të hënën për të vendosur për seancën e radhës në të cilën parashihen të diskutohen 33 çështje të ndryshme. E enjtja ose e premtja janë dy opsionet e Kryesisë për seancën e re plenare.
Edhe në këtë mbledhje, LDK dhe PDK shkojnë pa arritur ndonjë marrëveshje me partitë opozitare, të cilat e kanë bllokuar punën e Parlamentit në tri seancat e fundit, duke hedhur edhe gaz lotsjellës.
Vetëvendosje, AAK dhe NISMA janë duke i bojkotuar mbledhjet e Kryesisë derisa janë duke bllokuar mbajtjen e seancave plenare me kërkesën që të tërhiqen nënshkrimet nga marrëveshjet për Asociacionin dhe për demarkacionin me Malin e Zi.
Ndërkohë, partitë në pushtet, LDK dhe PDK kanë insistuar të vazhdohet normalisht me seancat e Parlamentit, shkruan Gazeta Express.
Në këtë situatë, Presidentja Atifete Jahjaga e ka dërguar në Gjykatë Kushtetuese marrëveshjen për Asociacionin për të parë nëse ky dokument është në përputhje me Kushtetutën e Kosovës. Gjykata ka pezulluar këtë marrëveshje deri më 12 janar të vitit të ardhshëm kur edhe pritet të nxirret një vendim nëse gjithçka është në rregull me Kushtetutën.
Sidoqoftë, Opozita ka paralajmëruar nisjen e protestave nëse Pozita vazhdon të shpërfillë kërkesat e tyre. Madje, tubimin e parë protestues, Opozita e ka paralajmëruar për 28 Nëntor, ditë kjo kur shënohet edhe Dita e Shpalljes së Pavarësisë së Shqipërisë.
Këto janë pikat e rendit të ditës së Kryesisë së Kuvendit
E Hënë, 16.11.2015 11:00 në sallën C 301
R e n d i i d i t ë s
1. Miratimi i procesverbalit nga mbledhja e mëparshme
2. Përgatitjet për seancën plenare:
1. Koha për deklarime jashtë rendit të ditës,
2. Koha për pyetje parlamentare,
3. Miratimi i procesverbalit nga seanca e mëparshme,
4. Shqyrtimi i Projektligjit për ratifikimin e Marrëveshjes ndërmjet Qeverisë së Republikës së Kosovës dhe Qeverisë së Dukatës së Madhe të Luksemburgut,
5. Shqyrtimi i Projektligjit për ratifikimin e Marrëveshjes bilaterale ndërmjet Qeverisë së Republikës së Kosovës dhe Qeverisë së Dukatës së Madhe të Luksemburgut për Projektin e Bashkëpunimit për Zhvillim: “KSV/018: Mbështetje Institucionale dhe Teknike për Sistemin e Furnizimit me Ujë në Rajonin e Mitrovicës”,
6. Shqyrtimi i parë i Projektligjit për Buxhetin e Republikës së Kosovës për vitin 2016,
7. Shqyrtimi i parë i Projektligjit për ndryshimin dhe plotësimin e Ligjit nr. 03/L-048 për menaxhimin e financave publike dhe përgjegjësitë, i ndryshuar dhe plotësuar me Ligjet nr. 03/L-221, nr. 04/L-116 dhe nr. 04/L-194,
8. Shqyrtimi i parë i Projektligjit për plotësimin dhe ndryshimin e Ligjit nr. 04/L-042 për prokurimin publik të Republikës së Kosovës, i plotësuar dhe ndryshuar me Ligjin nr. 04/L-237,
9. Shqyrtimi i parë i Projektligjit për Auditorin e Përgjithshëm dhe Zyrën Kombëtare të Auditimit të Republikës së Kosovës,
10. Shqyrtimi i parë i Projektligjit për administrimin e pasurisë së sekuestruar dhe të konfiskuar,
11. Shqyrtimi i parë i Projektligjit për profesionet e rregulluara në Republikën e Kosovës,
12. Shqyrtimi i parë i Projektligjit për ndryshimin dhe plotësimin e Ligjit nr. 02/L-31 për Lirinë fetare në Kosovë,
13. Shqyrtimi i parë i Projektligjit për ndryshimin dhe plotësimin e Ligjit nr 03/L-224 për Këshillin Prokurorial të Kosovës,
14. Shqyrtimi i parë i Projektligjit për Mjekësinë Ligjore,
15. Shqyrtimi i parë i Projektligjit për patentë shofer,
16. Shqyrtimi i parë i Projektligjit për Shërbimin e Jashtëm të Republikës së Kosovës,
17. Shqyrtimi i parë i Projektligjit për statusin dhe të drejtat e personave paraplegjik dhe tetraplegjik,
18. Shqyrtimi i dytë i Projektligjit për letërnjoftimin,
19. Zgjedhja e një anëtari joekzekutiv të Bordit të Bankës Qendrore të Republikës së Kosovës,
20. Zgjedhja e një (1) anëtari të Bordit të Radiotelevizionit të Kosovës,
21. Emërimi i kryesuesit dhe anëtarëve të Bordit Drejtues të Fondit të Kursimeve Pensionale të Kosovës,
22. Emërimi i anëtarëve të Këshillit për Ndihmë Juridike Falas,
23. Shqyrtimi i Raportit të Komisionit për Punë të Jashtme për mbikëqyrjen e zbatimit të Ligjit për Shërbimin Konsullor, të misioneve diplomatike dhe konsullore të Republikës së Kosovës,
24. Shqyrtimi i Raportit të Autoritetit Rregullativ të Komunikimeve Elektronike dhe Postare për vitin 2014,
25. Shqyrtimi i Raportit për gjendjen e mjedisit në Kosovë për vitin 2015,
26.Shqyrtimi i Raportit të Komisionit për të Drejtat e Njeriut, Barazi Gjinore, Persona të Pagjetur dhe Peticione për mbikëqyrjen e zbatimit të Ligjit për personat e verbër,
27. Shqyrtimi i Raportit vjetor financiar të Zyrës së Auditorit të Përgjithshëm për vitin 2014,
28. Shqyrtimi i rekomandimeve lidhur me raportin e auditimit për pasqyrat financiare të Ministrisë së Integrimeve Evropiane për vitin 2014,
29. Shqyrtimi i rekomandimeve lidhur me raportin e auditimit të performansës për mirëmbajtjen dhe servisimin e veturave zyrtare, si dhe raportit të auditimit të pasqyrave financiare për Ministrinë e Administratës Publike, Këshillin Gjyqësor të Kosovës, Doganën e Kosovës dhe Policinë e Kosovës për vitin 2014,
30. Shqyrtimi i rekomandimeve të Komisionit për Zhvillim Ekonomik, Infrastrukturë, Tregti dhe Industri lidhur me pozitën aktuale të prodhuesve dhe përpunuesve në industrinë e qumështit,
31. Kërkesa e kryetarit të Komunës së Prishtinës për dhënien e pëlqimit për rinovimin e sheshit
“Adem Jashari” në Prishtinë,
32. Formimi i Komisionit Ad-hoc për përzgjedhjen e kandidatëve për anëtarë të Bordit të Radio Televizionit të Kosovës,
33. Propozimi i G/P të Listës Serbe për zëvendësimin e nënkryetarit të dytë në Komisionin për Drejtat e Njeriut, Barazi Gjinore, Persona të Pagjetur dhe Peticione.