Kryetari Kuçi: Juniku po diskriminohet nga Qeveria e Isa Mustafës

Kryetari i Komunës së Junikut Agron Kuçi, në një konferencë për media ka thënë se komuna që ai udhëheqë është duke u diskriminuar nga Qeveria e Isa Mustafës. Ai thotë se komunat e madhësisë së njëjtë kanë buxhet shumëfish më të madh se sa Juniku.
Kryetari i Komunës së Junikut, Agron Kuçi, sot ka mbajtur një konferencë për media, ku ka shpalosur shqetësimin i tij për projekt-buxhetin për vitin 2016.

Sipas tij, Qeveria e Isa Mustafës po e diskriminon këtë komunë në ndarjen e buxhetit për investime kapitale, njofton Klan Kosova.

Juniku që ka 7 mijë banorë rezidentë, për kokë banori ka vetëm 12 euro investime kapitale, ndërsa buxheti në total për këto investime e ka 77 mijë euro.

Kuçi shtoi se kjo komunë është diskriminuar shumë pasi që komunat e madhësisë së njëjtë kanë buxhet shumëfish më të madh se sa Juniku.

Ai ka shtuar se komuna e Mamushës është shumëfish më e vogël me territor se sa Juniku ndërsa ka mbi 400 mijë euro buxhet për investime kapitale.

Agron Kuçi ka thënë se këtë buxhet nuk do ta votojnë në Asamblenë komunale.