Kuçi vizitoi institucionet në veri të Mitrovicës

Ministri i Drejtësisë Hajredin Kuçi vizitoi sot Komunën e Mitrovicës së Veriut dhe u prit nga kryetari i kësaj komune Goran Rakiq dhe Adriana Hoxhiq, shefja e Zyrës Administrative të Komunës së Mitrovicës së Veriut. Kuçi ka theksuar se shumë shpejt do të fillojë punën Gjykata Themelore në pjesën veriore të Mitrovicës, e cila do të ketë efektet e saj pozitive edhe për Qendrën e Paraburgimit në Mitrovicë.

Bashkërisht vizituan objektin ku do të vendoset Prokuroria Themelore dhe Gjykata Themelore për pjesën veriore, për të parë nga afër përgatitjet që janë duke u bërë dhe të dyja palët u dakorduan për përshpejtimin e punëve që objekti të jetë funksional në afatin optimal.

Ministri Kuçi dhe Rakiq e kanë vlerësuar të rëndësishëm implementimin e plotë të pikave të Marrëveshjes për Drejtësinë, të arritur në Bruksel, e cila garanton sistemin unik të drejtësisë në Kosovë dhe ofron drejtësi për të gjithë qytetarët.

“Politika integruese është e vetmja politikë që garanton integrimin dhe prosperitetin e të gjithë qytetarëve të asaj pjese të Kosovës”, vlerësoj Ministri Kuçi.

Sipas një komunikate të Ministrisë së Drejtsisë, gjatë vizitës në Mitrovicën e Veriut, Kuçi i shoqëruar edhe nga zëvendës shefja e misionit EULEX, Joelle Vachter ka vizituar edhe Qendrën e Paraburgimit në Mitrovicën e Veriut, ku është pritur nga drejtori Milan Radojeviq.

Ministri Kuçi e ka vlerësuar këtë institucion si shembull shumë të mirë të integrimit dhe profesionalizmit. Ai e ka përgëzuar drejtorin për lidershipin e treguar dhe i ka ofruar mbështetjen e vazhdueshmepër këtë institucion.

Kuçi ka theksuar se shumë shpejt do të fillojë punën Gjykata Themelore në pjesën veriore të Mitrovicës, e cila do të ketë efektet e saj pozitive edhe për Qendrën e Paraburgimit në Mitrovicë, sepse nuk mund të ketë drejtësi funksionale pa gjykata dhe shërbim korrektues funksional.

Vizita e sotme e Ministrit Kuçi në Mitrovicën e Veriut është pjesë e angazhimit dhe përkushtimit të tij dhe të Ministrisë së Drejtësisë për të funksionalizuar të gjitha strukturat e sistemit unik të drejtësisë së Kosovës në gjithë territorin e saj.