Kusari-Lila takon veteranët e UÇK-së në Gjakovë

Kandidatja e AKR-së për kryetare të Gjakovës, Mimoza Kusari-Lila ka takuar veteranët e UÇK-së në Gjakovë. Ajo me këtë rast ka thënë se nuk i ka takuar veteranët për të bërë politikë, por sipas saj janë kategoria që më shumë se askush tjetër meritojnë ta gëzojnë lirinë.

“Para jush luftëtarë të nderuar të lirisë, familje të dëshmorëve ndjehem e emocionuar për faktin se ishit ju ata që ju përgjigjët kushtrimit të atdheut. Gjakova si vend që ka dhënë më së shumti dëshmorë, martirë dhe viktima të luftës ndodhet në një proces shumë të rëndësishëm në mënyrë që pas 3 nëntorit të krijoj institucione të mirëfillta lokale. Këto zgjedhje janë mundësia që të mendojmë për idealin e atyre që dhanë më të shtrenjtën dhe të mundohemi t’i bëjmë krenar familjet dhe bashkëluftëtarët e tyre”, tha Kusari-Lila.

“Nuk kam ardhur sonte këtu të bëjë politik, nuk më shkon zëri të ju flasë për politikë, por kam ardhur të ju them sonte se epiteti i juaj nuk duhet të jetë më djemtë e luftës, por djemtë e lirisë sepse ju e meritoni më shumë se askush tjetër ta gëzoni lirinë”, tha ajo.

Sipas saj, përderisa nuk arrijmë t’i respektojmë të gjithë luftëtarët njëjtë atëherë s’mund të funksionojmë si shtet.

Kusari Lila i ka siguruar veteranët e luftës se do të jetë prioritet punësimi i tyre, bursat për fëmijët e tyre dhe të familjeve të të gjitha kategorive të luftës si dhe zbritje në tatimin në pronë dhe eliminimin e kushtëzimeve që qeverisja aktuale i ka shkaktuar për pagesën e shërbimeve komunale