Kush, pse dhe si i zhduku Xhavit Hazirin e Hafir Shalën?

Shkruan: Nehat SHAQIRI

Xhavit Haziri e Hafir Shala janë dy figura politike të zhdukura, e të cilët thuaja kurrë nuk kujtohen sipas respektit që e meritojnë, shkruan Gazeta NewBorn.

Këta dy së bashku me Ukshin Hotin, që ishin veprimtarë të çështjes sonë kombëtare, thuhet se u rrëmbyen e u zhdukën nga policia; ish-UDB-ja famëkeqe.

Po të këmbëngulej me vendosmëri zbardhja e rrëmbimit të tyre para Bashkësisë Ndërkombëtare, kur dihet se kush ishin zyrtarët e administratës së dhunshme serbe, në atë kohë, që i kidnapuan këta veprimtarë të dorës së parë të çështjes sonë kombëtare. Ndërsa, qarqet kompetente ndërkombëtare të EULEX-it, bëjnë çmos për personat e pagjetur, por vetëm kur është fjala për serbët e vrarë, madje edhe arrestojnë e dënojnë shqiptarë, gjoja për zhdukjen e serbëve që në realitet, nëse dikush nga ata ishte vrarë nga UÇK-ja, nuk ishin njerëz të thjeshtë, por kriminelë me damkë që kishin ardhur në Kosovë për të vrarë e masakruar popullsinë e pafajshme shqiptare dhe sot një numër i madh i kriminelëve të tillë sillen lirshëm në Kosovë dhe në Serbi.

“Vetëm me bashkimin e të gjithë potencialit kombëtar fitohet pavarësia, atëherë do ta kemi më lehtë dhe më afër ditën kur do ta kurorëzojmë Kosovën Republikë të Pavarur”, ishte njëra nga thëniet e Xhavitit.

Ish eprori i lartë i UÇK-së, dhe ish agjenti i SHIK-ut, Naim Miftari thotë për Gazetën NewBorn se vrasja e Xhavit Hazirit, dhe shumë bashkëluftëtarëve të tij, janë bërë të koordinuara nga Beogradi dhe të ndonjë “mini qendre” interesi të bashkëpunëtorëve të UDB-së.

“Vrasja apo zhdukja e Ukshin Hotit, Enver Malokut, Meh Ukës, Fehmi Aganit, Xhavit Haziri, Hafir Shalës, por edhe vrasjet e koordinuara të Adem Jasharit, Zahir Pajazitit, Muj Krasniqit e shumë vrasje të tjera të koordinuara nga Beogradi, por edhe të ndonjë mini qendre interesi i bashkëpunëtorëve të UDB-së, që kanë qenë shqiptar, bëhet pyetja se po të ishin gjallë këta persona dhe shumë atdhetar të tjerë si Isuf Gërvalla, dhe shumë nacionalistë shqiptarë të vrarë a do të ishte Kosova sot në këtë gjendje se ku gjendet sot”, thotë Miftari.

“Mendoj se qëllimi i Beogradit ka qenë vrasja e dijes, luftës, dhe nacionalizmit shqiptar”.

“Është shumë interesant se shumë vrasje dalin rreth LPK-së, dihet se pas vitit 1993 LPK-ja nuk ka qenë si ajo LPK-ja e më hershme. Këtë e them me plotë bindje se serbët din shumë gjëra dhe kanë pasë lojtarë të tyre, sikurse në Lëvizjet e tjera, por sidomos ishin prezent në LPK, ku po të njëjtit lojtarë serb eliminuar shumë nacionalistë dhe atdhetar të LPK-së për të ia hapur rrugën vetes. Prandaj, duhet shikuar se ku jemi ne sot si shtet dhe si shoqëri, serbët kurrë nuk kanë qenë ma me ndikim se sa sot, para luftës ata kanë qenë në pushtet, por si pushtues, sot janë kinse si aleat të Kosovës”, thekson Miftari. /Gazeta NewBorn/