LDK: Këshilltari i presidentes po përzihet në zgjedhjeve

Lidhja Demokratike e Kosovës shpreh keqardhjen e saj lidhur me deklarimet e këshilltarit politik të Presidentes Jahjaga lidhur me rezultatin e mundshëm të zgjedhjeve lokale.

LDK-ja thekson se Ramush Tahiri ka një funksion politik në institucionin më të lartë të vendit dhe duhet të sillet konform kësaj.

Gjithçka që thotë një person që ushtron një funksion të tillë, nënkupton qëndrim dhe pozicionim politik të institucionit të Presidentit të Republikës dhe nuk mund të mbulohet me petkun e analistit.

LDK-ja u bën thirrje të gjithë institucioneve që të jenë të përgjegjshme dhe të sillen konform normave kushtetuese dhe ligjeve të Republikës së Kosovës.

LDK-ja do të vijojë edhe më tutje punën dhe fushatën shembullore që bën, në të cilën LDK-ja po merr mbështetje masive, mbështetje që do të rezultojë me fitoren bindëse të LDK-së në zgjedhjet e 3 nëntorit.

LDK-ja do të vijojë të sillet konform normave, do të reflektojë qytetari gjatë fushatës dhe në ditën e zgjedhjeve, thuhet në kumtesën e LDK-së.