LDK shënon 26 vjetorin e themelimit

Lidhja Demokratike e Kosovës (LDK) do të shënojë të mërkurën 26 vjetorin e themelimit.

Me këtë rast, kryetari i kësaj partie, Isa Mustafa së bashku me anëtarët e Kryesisë së LDK-së, duke filluar nga ora 11:00 do të bëjnë homazhe te varri i presidentit të ndjerë, Ibrahim Rugova.

Me 23 dhjetorë 1989 u themelua Lidhja Demokratike e Kosovës, kurse kjo nismë erdhi nga shkrimtarët Jusuf Buxhovi, Ali Aliu, Ibrahim Berisha, Mehmet Kraja dhe Xhemail Mustafa.

Kuvendi themelues u mbajt më 23 dhjetor 1989, në lokalet e Shoqatës së Shkrimtarëve të Kosovës, ku në emër të Këshillit nismëtar dhe të Kryesisë së punës, Programin e Lidhjes Demokratike të Kosovës dhe Statutin e saj e lexoi Jusuf Buxhovi.

Në këtë Kuvend, kryetar i Lidhjes Demokratike të Kosovës u zgjodh Ibrahim Rugova, sekretar- u zgjodh Jusuf Buxhovi, kurse  anëtarë të Kryesisë,  Fehmi Agani, Bujar Bukoshi, Nekibe Kelmendi, Ali Aliu dhe Mehmet Kraja.