Mundësi të reja për ndërmarrësit në Kosovë

Në kuadër të projektit Koalicioni i Bashkuar për Ndërmarrësi të financuar nga Ministria e Punëve të Jashtme të Holandës, organizata nga Holanda BiD Network në bashkëpunim me Business Support Centre Kosovo (BSCK) për të tretin vit radhazi kanë filluar implementimin e garës me biznes plane për ndërmarrësit dhe bizneset kosovare që kanë nevoja financiare nga 10,000 deri 5 milion dollarë. Inovacionet me potencial rritjeje prezantohen tek një rrjet i investitorëve privat dhe ndërlidhen me fonde të NVM-ve nga e gjithë bota.

Të gjithë ndërmarrësit kosovar që kanë ambicie për t’i jetësuar bizneset e reja apo për t’i rritur ato ekzistuese mund të përfitojnë nga gara online me biznes plane, që ka të vetmin qëllim, nxitjen, zhvillimin ekonomik dhe krijimin e vendeve të reja të punës në tërë territorin e Kosovës. Biznes planet premtuese prezantohen tek investitorët nga BiD Network dhe marrin këshilla nga ekspertët në të gjitha aspektet për të arritur një marrëveshje me investitorët potencial.

Si rrjedhojë e ndërlidhjes së bizneseve kosovare me investitor ndërkombëtar, të gjitha bizneset planet e dorëzuara në platformën online duhet të jenë në gjuhën angleze. Kjo garë është e hapur për të gjithë ata të cilët kanë apo dëshirojnë të hapin biznes në Kosovës, pa marr parasysh se ku jetojnë, deri më 5 nëntor 2013.

Të gjithë të interesuarit që dëshirojnë të fillojnë ose zgjerojnë biznesin e tyre dhe të përfitojnë nga ky program, mund të aplikojnë përmes http://www.bidnetwork.org/kosovo.

Gjatë kësaj gare, të gjithë aplikantët do të përfitojnë trajnime falas, të cilat përfshijnë trajnimin mbi pasqyrat financiare dhe trajnimin mbi prezantimin e planit të biznesit para investitorëve, që janë ndihmesë në përpilimin më të suksesshëm të planeve biznesore.

BiD Network operon në 17 shtete të ndryshme të botës: në Amerikën Latine, Azi, Afrikë, dhe Lindjen e Mesme. Deri më sot numëron 40 mijë anëtar, 10 mijë ndërmarrës, 3 mijë biznes plane, 800 trajnerë dhe 115 investitor ndërkombëtar.