Ndërpritet votimi në një qendër votimi në veri

Kryetarja e Komisionit Qendror të Zgjedhjeve,Valdete Daka, ka thënë se një grup personash të maskuar ka sulmuar një qendër votimi në veri të Mitrovicës, në shkollën fillore “Sveti Sava”, duke dëmtuar materialin zgjedhor. Një gjë të tillë e ka konfirmuar edhe rrjeti i organizatave joqeveritare Demokracia në Veprim. 

Daka. ka theksuar se personeli i KQZ-së nga ajo qendër votimi është larguar dhe procesi është ndërprerë.

Daka tha gjithashtu se lidhur me këtë rast janë njoftuar të gjitha autoritetet e rendit, policia e Kosovës, EULEX-i dhe faktorët tjerë relevantë.

Përfaqësuesit e shtabit për bojkotimin e zgjedhjeve në veri të Kosovës, kanë deklaruar më herët se janë duke i mbikëqyrur të gjitha vendvotimet në veri të Kosovës.

Sipas tyre, kjo mbikëqyrje nuk po bëhet për të kërcënuar votuesit potencial, por sepse ata posedojnë informata se vendvotimet mund të sulmohen me qëllim që të fajësohet vetë Shtabi për bojkotimin e zgjedhjeve.

Nebojsha Joviq, përfaqësues i këtij shtabi, i ka thënë Radios Evropa e Lirë se për një gjë e tillë, sipas informatave që posedojnë, mund të ndodhë në ndodhë në orët e vona të pasdites.

“Ka indikacione, gjë që mund të jetë shumë e rrezikshme dhe për këtë dua të tërheq vëmendjen, sepse kemi informata konkrete që nëse përqindja e votuesve mbetet e vogël, atëherë  në orët e vona të pasdites ose në mbrëmje, mund të presim sulm nga disa njerëz me ‘fantom kapela’, të cilët do të dalin me shkopinj bejsbolli…kështu flitet, dhe se do të shkatërrojnë vendvotimet dhe mbase edhe t’i sulmojnë njerëzit në këshillat zgjedhore”, ka theksuar Joviq.