PDK-ja e bindur në fitoren e Prishtinës

Kryeministri i Kosovës, Hashim Thaçi, ka dalë që të mbështesë kandidatin e Partisë Demokratike të Kosovës për kryetar të Prishtinës, Agim Çekun, duke bërë fushatë “derë më derë” me qytetarë, afër Xhamisë së Llapit.

Kryeministri Thaçi i ka falënderuar qytetarët për mbështetjen e tyre që ia kanë dhënë PDK-së dhe kandidatit Çeku, për të cilin tha se do ta ndërtojë një Prishtinë evropiane.

“Unë dëshiroj t’i falënderoj qytetarët e Prishtinës për gatishmërinë e tyre për të dal në zgjedhje. I falënderoj për disponimin e tyre pozitiv dhe shumë të mirë për PDK-në për kandidatin dhe kryetarin e ardhshëm, Agim Çekun. PDK-ja ka prezantuar si kandidaturë me besim të plot për fitore të kryeqytetit për ndërtimin e Prishtinës Evropiane, burrështetasin e Kosovës i respektuar në gjithë botën por edhe vizionarin për ndryshimin e Prishtinës Evropiane. I falënderoj qytetarët për mbështetje të konsoliduar që është garanci fitores së Çekut në Prishtinë”, ka thënë Thaçi.

Ndërsa, Çeku ka thënë se deri më tani çdo takim që e ka pasur me banorët në kryeqytet, ka pasur kërkesa për ndryshime. Ai ka thënë se qytetarët ia besojnë udhëheqjen, sidomos pasi e kanë parë mbështetjen e fuqishme që ia ka dhënë kryeministri dhe Qeveria.

“Edhe sot edhe ditën më parë në çdo takim me qytetarët të lagjes që po e vizitojmë, çdo fshat që po e vizitojmë qytetarët po kërkojnë ndryshime, po e shohim që qytetarët po e mbështetin PDK-në. Fitorja ime drejt Prishtinës është duke ardhur, është afër dhe do të ndodh. Vërtet kjo po shihet në çdo kënd sepse qytetarët po e japin besimin edhe në mua edhe në PDK, sidomos tani që e dinë që e kemi mbështetjen e fuqishme të kryeministrit dhe qeverisë së Kosovës”, ka theksuar Çeku, raporton KP.