“PDK-ja në balotazh, koalicion me AAK dhe AKR në Istog”

Kandidati i PDK-së për kryetar të Komunës së Istogut, Shasivar Haxhijaj ka deklaruar se nëse Partia Demokratike e Kosovës qeverisë me Istogun, kjo komunë do të përparoj shumë sa i përket zhvillimit të turizmit, bujqësisë si dhe zhvillimit ekonomik.

Haxhijaj në një intervistë për Kosovapress, ka thënë se kjo parti e ka programin e qartë se si do të menaxhoj me Istogun dhe ta zhvilloj atë.

Ai ka kritikuar qeverisjen aktuale se nuk ka punuar aq sa është dashtë.

“Fatkeqësisht në Komunën e Istogut ka mungesë totale të hartimit të projekteve, pothuajse për asgjë nuk ka projekt të hartuar.

Nëse sot dëshirojmë ta ndërtojmë një rrugë, ne për asnjë rrugë nuk kemi projekt në Komunë dhe kjo është dobësi pikërisht e Kuvendit Komunal, e kryetarit, e Komunës”, ka deklaruar ai.

Mirëpo, Haxhijaj u ka premtuar banorëve të kësaj ane se në rast se PDK-ja qeveris me Istogun, do të ndryshojnë shumë gjëra.

Ai ka theksuar se në platformën e PDK-së për qeverisje të Istogut janë paraparë disa prioritete.