Për pesë vjet me radhë, ish-kryeministri i Kosovës, Hashim Thaçi, nuk u ndal asnjëherë së premtuari liberalizimin e vizave për qytetarët e Kosovës, raporton KTV. Që nga zgjedhjet e vitit 2010 e deri më tash, ai ka vazhduar vetëm të flasë për procesin e liberalizimit të vizave. Por, edhe pas këtyre viteve, Kosova ende mbetet në geto dhe kosovarët udhëtojnë shumë pak. Më 2010, shtetet fqinje të Kosovës u liruan nga regjimi i vizave. Shqipëria dhe Bosnja Hercegovina janë dy shtetet e fundit që përfituan nga ky proces, por jo edhe Kosova, që mbeti i vetmi vend i izoluar në Ballkan, transmeton Koha.net. Është e vërtetë që premtimeve të Thaçit ia panë hairin vetëm kolegët e tij, me të cilët së bashku udhëtoi mjaft shumë. Ndërsa qytetarët e Kosovës vazhdojnë të presin me orë të tëra para ambasadave për të marrë viza, e që në masë të madhe kthehen të dëshpëruar në shtëpi.

Balkanspring, si dyqani i parë dhe i vetëm online në Kosovë që merret me shitjen online të prodhimeve artizanale të grave të Kosovës, do t’i prezantojë punët e tyre në ekspozitën e cila do të mbahet në Shtëpinë e Bardhë.

E gjithë kjo është bërë me ftesë të Departamentit Amerikan të Shtetit, ku Balkanspring.com do të jetë prezente në Kampanjën Globale të Ndërmarrjeve Artizanale e cila filloi më 9 shtator dhe do të mbahet deri me 11 shtator 2015 në Washington D.C. Për KultPlus, udhëheqësja e këtij dyqani Sara Fusha tregoi për rëndësinë e kësaj paraqitjeje për të gjitha gratë e Kosovës.

“Është jashtëzakonisht e rëndësishme paraqitja e prodhuesve artizanalë të Kosovës në këtë konferencë, dhe ekspozimi i disa nga produkteve punëdore këtu në Shtëpi të Bardhë, sepse kjo përveç që do të promovoje produktet, prodhuesit dhe Kosovën do të krijoje kontakte dhe mundësi të reja për bashkëpunim dhe zgjerim të tregut”, tha Sara Fusha duke vazhduar të tregoj se në këtë ekspozitë do të prezantohet veshje të ndryshme të punuara nga gra të Kosovës si thurje, bizhuteri, punime ne vek, e kështu me radhë.

Kjo ngjarje është e organizuar nga Aleanca për Ndërmarrës Artizanalë, e drejtuar nga organizata për studime edukative dhe politike “Aspen Institute” me bazë në Washington DC dhe e lansuar nga ish-Sekretarja e Shtetit, Hillary Clinton, më 2012. Me këtë ngjarje synohet krijimi i vendeve të reja të punës në Kosovë, rritja e kapacitetit të prodhimit dhe eksportit për kompani të mëdha botërore, rrjetëzimi me biznese tjera… Përveç pjesëmarrësve ekspozues dhe bizneseve të ndryshme nga e gjithë bota, të pranishëm do të jenë Ambasadorë të shumtë nga Departamenti i Shtetit si dhe mysafirë tjerë.