Presidentja Jahjaga ngushëlloi presidentin Erdoğan

Presidentja e Republikës së Kosovës, zonja Atifete Jahjaga i ka dërguar telegram ngushëllimi Presidentit të Turqisë Recep Tayyip Erdoğan, me rastin e sulmit të sotëm terrorist në Ankara.

Në telegram thuhet:
Me pikëllim të thellë morra lajmin e sulmit të tmerrshëm terrorist që ndodhi sot në Ankara, i cili la të vdekur dhjetëra njerëz dhe qindra të tjerë të plagosur.
Në emër të institucioneve të Kosovës, të qytetarëve të saj dhe në emrin tim personal, Ju shpreh ngushëllimet më të sinqerta për jetët e humbura të njerëzve të pafajshëm, familjarëve të tyre dhe të gjithë qytetarëve të Republikës së Turqisë, si dhe shërim të shpejt të gjithë të plagosurve.
Institucionet e Kosovës dënojnë rëndë këtë akt terrorist dhe qëndrojnë pranë popullit turk në këto orë të rënda për ta. Ne shprehim përkushtimin tonë të palëkundur për të fituar betejën kundër terrorizmit dhe ekstremizmit, krahë aleatëve tanë, të cilën kanë synimin e përbashkët të mbrojtjes së të drejtave të qytetarëve dhe garantimin e prosperitetit të tyre, të ruajtjes së sigurisë globale dhe stabilitetit të përbashkët.
Në këtë kohë zie dhe pikëllimi për vendin tuaj, mendimet dhe lutjet tona janë me qytetarët e Republikës së Turqisë.
Shkëlqesia Juaj, populli i Kosovës qëndron pranë Jush. Ju shpreh konsideratat e mia më të larta.