Prokuroria nuk ka dërguar në mënyrë të rregull ftesat për Kurtin dhe Haxhiun

Prokuroria Themelore në Prishtinë, pas shqyrtimit të shkresave të lëndës, ka konstatuar së ftesat e dërguara në adresë të të pandehurve Albin Kurti dhe Albulena Haxhiu, nuk kanë mundur që të dorëzohen në mënyrë të rregullt, siç e parashohin dispozitat e Kodit të Procedurës Penale të Kosovës,

Andaj Prokuroria do të provoj sërish, dorëzimin e ftesave për të njëjtit, në bazë të nenit 151 paragrafi 2 të Kodit të Procedurës Penale të Kosovës, për t’u paraqitur para prokurorit të shtetit, për të dhënë deklaratat e tyre lidhur më dyshimet që iu vihen në barrë, mirëpo të njëjtit mund të paraqesin ankesë te gjyqtari i procedurës paraprake për të vendosur mbi ligjshmërinë e detyrimit të tyre për t’u paraqitur para prokurorit të shtetit.

Nëse të pandehurit, në rastin konkret Kurti dhe Haxhiu, të cilët janë thirrur me rregull nuk paraqiten dhe nuk e arsyetojnë mungesën e tyre ose kur thirrja nuk ka mundur t’iu dërgohet sipas rregullit dhe kur sipas rrethanave është e qartë se të pandehurit i shmangen pranimit të thirrjes, sipas dispozitës së nenit 175 paragrafi 1 të Kodit të Procedurës Penale, gjyqtari i procedurës paraprake më kërkesë të prokurorit të çështje s lëshon urdhërarrest.

Gjithashtu, njoftojmë opinionin së Prokuroria Themelore në Prishtinë pas tentimit për dorëzimin e ftesave të para për të pandehurit Albin Kurti dhe Albulena Haxhiu, nuk ka lëshuar autorizim për arrestim ose aktvendim për ndalim kundër këtyre të pandehurve lidhur më ngjarjet në Kuvendin e Kosovës të datës 08.10.2015, por përkundrazi do të provoj t’u jap edhe një rast tjetër për tu paraqitur në Prokurori, në mënyrë që të njëjtit të kontribuojnë në zhvillimin dhe përfundimin normal të procedurës penale, në bazë të ligjeve të cilat i kanë votuar vet si deputet të Kuvendit të Republikës së Kosovës