Raporti i Progresit ‘raport i regresit”

“Raporti përshkruan realitetin dhe progresin e paarritur, rezultatin shumë të dobët në fushën e sundimit të ligjit dhe luftë kundër krimeve dhe korrupsionit. Nëse është bërë me dije qysh në qershor të vitit të kaluar që barometër matës të rezultateve dhe për progres në Kosovë, edhe për integrime edhe për liberalizim të vizave do të jetë rezultatet e prekshme në sundim të ligjit”, tha Haziri.

Raporti i progresit për Kosovë ka shënuar disa përmirësime në rrafshin e ligjbërës megjithatë ka shumë pika të zeza edhe këtë vit sidomos në fushën e sundimit të ligjit. Për këtë raport i cili ende nuk është lancuar zyrtarisht ka mendime të ndryshme nga forcat politike të pozitës dhe opozitës. Derisa qeveria përmend për “Standardin info”, të arriturat pa anashkaluar edhe vrimat e zeza që kryesisht i ndërlidhin me probleme transkufitare, forcat opozitare thonë se qeveria nuk ka bërë progres në këtë fushë.

Zëvendësministri Gëzim Kasapolli e quan të rëndësishme që KE ka dhënë vlerësim pozitiv për të arriturat si shtet i ri në miratimin e ligjeve sipas standardeve të BE dhe  ka konstatuar edhe ndërtimin e institucioneve që do të merren me përmbushjen e sfidave sic janë krimi i organizuar, korrupsioni, trafikimi etj të cilat mbeten sfida shumë serioze tek të cilat institucionet do të angazhohen me prioritet sepse kërkohet një angazhim afatgjatë. “Presim edhe ndihmën e faktorit ndërkombëtar EULEX sepse është një fushë e cila nuk mund aktualisht të përballohet vetëm nga institucionet e Kosovës. krimi i organizuar, korrupsioni, trafikimi janë të karakterit rajonal dhe ndërkombëtar që kërkojnë një angazhim në bashkëkoordinim më të gjerë të institucioneve në nivel rajonal”, tha Kasapolli.

Por për anëtarë të komisionit për integrime evropiane ekzekutivi nuk ka reflektuar angazhimin e duhur.

Për Lutfi Haziri kryetar i komisionit për integrime evropiane vlerësimet e tilla kanë qenë të pritshme. “Raporti përshkruan realitetin dhe progresin e paarritur, rezultatin shumë të dobët në fushën e sundimit të ligjit dhe luftë kundër krimeve dhe korrupsionit. Nëse është bërë me dije qysh në qershor të vitit të kaluar që barometër matës të rezultateve dhe për progres në Kosovë, edhe për integrime edhe për liberalizim të vizave do të jetë rezultatet e prekshme në sundim të ligjit”, tha Haziri. Sipas tij, kjo nënkupton që lufta kundër krimeve dhe korrupsionit dhe keqbërësve në Kosovë ka me qenë e pakompromis dhe do të ketë rezultate të prekshme dhe jo vetëm deklarative. “Fatkeqësisht nominimet që kanë ndodhur për zgjedhjet lokale e kanë rënduar situatën jashtëzakonisht shumë”, thotë.

 

 

Ndërsa anëtarja e komisionit Blerta Deliu e konsideron positive miratimin e pakos ligjore antikorupsion ndonëse pohoi se sfidë do të mbetet implementimi i asaj pako. “Konsideroj se do të ndërtohet një strategji e mirëfilltë për luftim të korrupsionit sepse është sfidues dhe po vazhdon të sfidojë vendin. Të gjitha shtetet e Ballkanit perëndimor janë të prekura nga ky fenomen. Mendoj se shpejt qeveria do të del me mekanizma të veçantë dhe ne do të monitorojmë implementimin e këtyre ligjeve”, tha Deliu. Ndryshe ajo konsideron se ka pasur përpjekje pozitive për me punuar në këtë drejtim.

Deputeti nga radhët e AAK Ardian Gjini thotë se pjesa dërmuese e gjithë asaj që quhet progres atëherë nuk mund të flitet për progres në Kosovë në aspektin qeverisës. “Apsolutisht po kërkohet progres dhe nëse sfidat e njëjta mbesin prej raportit të kaluar në këtë raport domethënë në Kosovë ka pasur stagnim të qeverisjes në luftë kundër korrupsionit , krimit të organizuar, zhvillimit ekonomik etj”, tha ai.

Kurse anëtarja e komisionit për integrime Alma Lama është e bindur se raporti i ri nuk do të ndryshojë shumë nga raporti i kaluar. “Nuk kemi parë reformat e ndërmarra nga qeveria aktuale dhe nuk kemi parë as përmirësim të situatës sa i përket drejtësisë. Pra vazhdim kemi një gjyqësor po kaq të politizuar dhe të korruptuar. Vazhdojmë të kemi një qeveri e cila është vetë bartësja e korrupsionit, prodhuesja e këtij korrupsioni dhe është vështir të pretendohet që pikërisht kjo qeveri do të luftojë korrupsionin. Nëse këto janë dy pikat kryesore në këtë aspekt nuk kemi pasur asnjë lloj zhvillimi”, tha ajo. Sipas saj, nëse krahasojmë me ato pika vërejtje që janë dhënë vitin e kaluar dhe përmbushjen e tyre përveç një lloj ane formale të miratimit të disa ligjeve asgjë tjetër nuk ka ndryshuar. “Miratimi i ligjeve është hap i rëndësishëm mirëpo implementimi është shumë më i rëndësishëm sepse vërtet kemi ligjet më të mira në rajon, mirëpo në implementim jemi shumë të dobët”, tha Lamaj